Bawlhhlawh sâwngbàwltute Counselling neihpui an ni

Committee on Psychological and So­cial Guidance on Covid-19 member-te chuan nimin khan SIP­MIU hnuaia Aizawl Solid Waste Management Centre (bawlhhlawh sawngbawlna)-a thawkte free medical check-up leh counselling an neihpui.

He hunah hian Psychological and Social Guidance Committee aṭangin convener Prof. Zokaitluangi bakah, Dr Zothanzami, Dr Lalremruati, Lalhmingmawii leh Johny Lal-

ṭhafamkima te an kal.

Aizawl Solid Waste Management Centre-a thawk mi 33-te chu counselling session an neihpui a; Dr Vanlalpeka PL Pachuau, epidomoligist Dr Lianpuithangi leh Aizawl East mobile medical unit-te'n a thlawnin hriselna dinhmun an endik a ni. Rapid antibody test (RAT) hmangin an endik bawk a, sanitary worker zingah rinhlelhawm an awm lo.

SIPMIU hotute chuan, Covid-19 léng vanga inkhàrkhip lai pawhin essential service-in a huam tel Aizawl SWMC, Tuirial chu chawlh leh khuahkhirh awm loa hna kalpui reng a ni tih an tarlang a, "Lockdown leh curfew lai pawha Aizawl mipuite'n a hun taka bawlhhlawh an paih theih nan ruahmanna siam a ni a, SWMC kalphung pangngaiin bawlhhlawh ṭawih thei leh ṭawih thei lote thliar hran a, senghawi zel a ni," an ti.

Aizawl SWMC-a thawkte himna an ngai pawimawh tih sawiin SIPMIU hotute chuan, "Training pek an ni a, an hriselna leh himna ngai pawimawh tur leh an hnathawh dan tur chiang taka zirtir an ni. Covid-19 lên hma pawhin kutkawr leh hmai tuamna hmantir niin, ni khatah vawi thum tal inbual tur leh hnathawh zawha an in an pan dawnah  phei chuan inbual ngei ngei tura hriattir an ni," an ti a; hripui lèn hnuah phei chuan thuam famkima inthuam ngei tura hriattir an nih thu an sawi.

SIPMIU tarlan danin, Aizawl SWMC-a bawlhhlawh sâwngbàwl hna chu mi 30 chuangin an thawk a, personal protective equipment (PPE) nen an thawk a ni. Bawlhhlawhte chu damdawi tuia an phuh hnuah ni 3-5 an dah a, chumi hnuah an sawngbawl chauh ṭhin. A khát tâwkin medical test tihsak reng a ni bawk.