Mizorama tangkhang mekte'n Governor puihna an ngen

Mizorama tangkhang mek, an awmna state-a haw duh zirtirtu leh zirlai mi pariatte chuan hawna tur remchang an hmuh theih loh avangin nimin khan Governor PS Sreedharan Pillai an hmu a, hma lakpui turin an ngen. Larsap chuan, Mizorama tangkhang mek state páwn lama haw turte chu a ṭul anga a puih tur thu a lo hrilh.

Governor chuan, airport ṭhenkhatte an la inhawn theih loh avangin ni rei lote chhung chu nghah rih pawh a ṭul a rin thu sawiin, "Covid-19 hripui léng vangin mi tê ber aṭanga lian ber thlengin harsatna kan tâwk vek a, kan zavaia ṭang tlangin paltlang kan tum a ngai a ni," a ti.

Mizoram Raj Bhavan chu state danga Raj Bhavan-te ang a ni lo tih sawiin, PS Sreedharan Pillai chuan, "Mizoram aṭanga hmun dang pan duh ṭanpui ngai emaw, páwn lam aṭanga Mizorama rawn haw duhte tan pawh Raj Bhavan hi phone hmanga biak theih reng a ni," a ti a; Raj Bhavan chu a mamawhtu apiang tan a inhawn thu a sawi.

Mizorama tangkhang mek, nimina Governor hnena an harsatna thlen­tute hi Arunachal Pradesh, Uttar Pradesh, Haryana, Rajasthan leh Kerala mite an ni a, an hawna tur thlawhtheihnate cancel leh postpone a ni.

An zinga ṭhenkhat sum nei tlem tawh, hotel-a thlenna tur senso nei tawh lo mi palite chu Governor chuan Raj Bhavan-ah May 25, Thawhṭanni 

aṭangin a mikhual tawh a, nimin khan ṭanpuina diltute tan chawchhun a buatsaih bawk.

Hetih lai hian, Ram­­rikawna IIMC hostel-a awm mek zirlai tangkhangte tan Larsap ruahmannain Raj Bhavan staff-te'n chawlhkar khat chhung chu ni tin chaw an pe tawh a ni.