Zu ûm 28,154 leh lt. 76,886.565 END-in thla 10 chhungin an man; Kuminah ruihhlo ti ṭhin mi 58 thi tawh
Excise & Narcotics department (END) chuan kuminah thla 10 chhungin sapzu ûm 28,154 leh rakzu litre 76,886.565 an man tawh. Thla 10 chhung vêkin Mizoramah ruihhlo kaihhnawih thil vangin mi 58 an thi tawh a, kum 1984 aṭanga kumin thlengin mi 1,794 an thi tawh.
END hian kumin January 1 aṭanga October 31 chhung khan zu lam chi-ah - sapzu ûm chi hrang hrang 28,154 an man a, rakzu litre 76,886.565 an man bakah, zu bilh lai ṭîn 1,58,911 manin an tichhia. Myanmar zu litre 2,328.300 an man a, beer ûm/bûr 38,771 an man bawk.
Ruihhlo lamah END chuan kumin chhungin heroin kg. 74.220 leh methamphetamine kg. 78.818 an man tawh a; ganja leh damdawi ruih theih dang eng emaw zat an man tawh bawk a ni.
END chhinchhiah danin, kumin January 1 aṭanga October 31 thlengin ruihhlo kaihhnawih vanga thi mi 58 zinga 47 chu mipa an ni a, mi 11 chu hmeichhia an ni. Nikum 2022 chhung khan mi 43 (mipa 37 leh hmeichhia paruk) an thi a, nikum thla 12 chhunga thi zat aiin kumin thla 10 chhunga thi zat mi 15-in an tam tawh zawk.
END hotute chuan, kumin chhunga ruihhlo kaihhnawiha thi zinga a tam ber, 99% vel chu heroin kaihhnawih a nih thu leh kum 2015 leh a hnu lama ruihhlo kaihhnawiha thite pawh a tam ber chu heroin khawih an nih thu an sawi a; nitrazepam/alprazolam khawih ṭhin zingah thi tlemtê an awm thu an sawi bawk.
END-in an chhinchhiah chinah, kum 1984 aṭanga kumin October thla thlengin ruihhlo vangin mi 1,794 an thi tawh a, mipa 1,576 (87.85%) leh hmeichhia 218 (12.15%) an ni. Ruihhlo vanga thi an tam ber kum chu 2004 kha a ni a, mi 143 an thi a, ruihhlo vanga thi chhinchhiah hnuah kum 1986 khan thi an awm lo thung.
END hian kum 1984-ah ruihhlo vanga thi an chhinchhiah ṭan a, kum nga chhung chu mipa vek an ni a, kum 1989 aṭangin hmeichhia an thi ve ṭan a ni.