MPCC Media-in state lottery hmanga inrawkna kalpuiah MNF sorkar an puh

Mizoram Pradesh Congress Committee (MPCC) Media depatment hotute chuan nimin khan Aizawl Press Club-ah thuthar thehdarhtute an kâwm a; Mizoram sorkarin State Lottery hmangin eirûkna leh inrawkna nasa takin a kalpui mek thu leh kum nga chhungin cheng vbc. 226.47 vel sorkarin a hloh anga chhût a nih thu a sawi.

MPCC Media chairman Lalremruata Renthlei chuan, state lottery hmanga eirûknaah minister lawk leh sorkar officer lian eng emaw zat an inrawlha sawi a awm tih a sawi a, "Mimal sumdawng leh sorkar mi inthlun zawmin, mimal hlâwkna tél an awm ngeia hriat a ni a, Mizoramin nasa takin sum leh pai a hloh phah a ni," a ti.

Mizoramin lottery a kalpui dan a felfai avang leh mumal taka vil a nih ṭhin avangin India ram pumah hriat a hlawh phah nia sawiin Lalremruata chuan, "Kum nga kal ta aṭang erawh chuan eirûkna leh inrawkna hmanruaah a chang," a ti a; minister lawk ṭhenkhat, sorkar hnathawk lian leh mimal sumdawngte hlâwknaah a chang tawha ngaih theih turin thil a kal kual nasa niin a sawi.

MPCC Media Chairman sawi danin, Mizoram State Lottery official-te'n Supreme Court-a statement an peka a lan danin, Mizoram State Lottery-in ni khata revenue a siam theih chu a tlem berah cheng nuai 20 a ni a, kum khatah cheng vbc. 72 vel a ni. Mizoram sorkarin kum nga kal ta chhungin cheng vbc. 275.60 la lut thei tur anga chhût theih a ni a, Mizoram sorkarin kum nga chhunga sum a hloh chu vbc. 226.47 vela chhût theih a ni.

Minister zingah leh sorkar hnathawk lian ṭhenkhat zingah eirûkna a nasat avangin Mizoram sorkarin kum nga kal ta chhungin cheng vbc. 31.34 chiah Lottery aṭangin revenue a la lut. Thil an tihkhawloh avangin kum khata lottery hmanga sorkar sumdawnna aṭanga cheng vbc. 72 chuang la lut thei tura ngaihah kum 5 chhungin cheng vbc. 31 chuang hret an la lut a ni.

Lalremruata Renthlei chuan, lottery kalpui tura Mizoram sorkarin Skill Lotto Solution leh BS Enterprise nena inremna an siam chu an titawp tih sawiin, "Heng company ngâi vêk hi a hmaa an inremna aia rate hniam zawkin inremna an ziahpui leh a ni," a ti.

MPCC Media hotute chuan, sorkar awmze nei leh kalphung felfai zawk a din theihna turin Congress party-in ruahmanna felfai tak an siam tih an sawi a; Mizoramin harsatna khirhkhân tak tak a tawh mekte chinfel a nih theih nan Congress party thawhpui turin mipui an sáwm a ni.