Sum harsatna sawi nêp chi a ni lo - MNF

MNF general secretary (finance) PC Laldinthara chuan nimin khan Aizawl Press Club-ah thuthar thehdarhtute a kâwm a; Covid-19 vanga Mizoram sorkarin harsatna a tawhte chu sawi nêp chi a nih loh thu a sawi.

PC Laldinthara chuan, ZPM thuchhuahah, 'Covid chhuanlama kan sum hmuh loh an sawi ziah vbc. 2,636.52 leh kan dawn belh zat vbc. 2,563.17 inthlauhna cheng vbc. 73.35 chauh a ni' an tih chu a chháng a, "Covid puala central aṭanga ṭanpuina kan hmuh chu cheng vbc. 79.62 vel bâk a ni lo. RTI Act hmanga zawhna Finance department chhannaa a lan danin, central aṭanga hmuh loh pawh cheng vbc. 2,636.52 ni loin, vbc. 2,632.58 zawk a ni," a ti.

RTI Act chhannaah, Covid vanga sum hmuh loh June 30, 2021 thleng chauh chhan a nih thu sawiin PC Laldinthara chuan, "A hnu lamah Covid a la lêng nasa. Hemi piah lama kan hmuh loh leh Covid vanga state own tax leh non-tax revenue lak theih loh nen chuan cheng vbc. 3,000 a chuang daih ang tih ṭhin a ni. ZPM sawi kan hmuh belh hi Share of Taxes aṭanga kan hmuh belh a ni," a ti a; sum hmuh belh chuan sorkar hnathawk hlawh leh pension lawmman September 1, 2018 aṭanga 7th Pay sorkarin a pek punna kum tin a sèn belh pawh a daih lo hle niin a sawi.

PC Laldinthara chuan, Share of Taxes-a sum hmuh belh an sawi lâr laiin, Post Devolution Revenue Deficit Grant (PDRDG)-a kum tin sum hmuh a tlem thu an sawi lang duh loah ZPM a puh.

MNF General Secretary sawi danin, Covid a ziaawm deuh hnuah state tinin corporate tax, income tax leh GST an chhûn luh a pun avangin Share of Taxes-a Mizoram chan tur a pung. India ram sum dinhmun a ṭhat a, Mizoramin chhiah a chhûn luhte a pun zel chuan Share of Taxes chu a hmu tam zel dawn a ni. PDRDG hmuh zat erawh 15th Finance Commission ruahman angin a tlem zel dawn thung a, kum 2025-26 ah chuan cheng vbc. 586 chauh hmuh a ni dawn a ni.

PC Laldinthara chuan, Covid vanga sum harsatna Mizoramin a tawh chu sawi nêp theih a ni lo nia sawiin, "Hmuh tur anga beisei hmuh loh a tam avangin vawiin thlengin sumah sorkarin harsatna a la tâwk mek zel a, hmasawn zawngin insiamrem chhoh zel a ni," a ti.