Raw chìn chungchangah sorkar a hlawhchham chiang hle - Dr Mathlantea

MLA Dr Vanlalthlana chuan nimin khan press statement tichhuakin, MNF kaihhruai Mizoram sorkar chu raw chìn chungchangah a hlawhchham chiang hle niin a tarlang.

Dr Vanlalthlana chuan, SEDP hnuaiah rua chíngtu hlawhtling an la awm lo tih sawiin, "Raw ṭha mi kha an chíng ta lo nge, sorkarin raw chi supply-tute sum siam nan an hmang ta zawk tih hi mipui zawhna lian ber a ni. Kum nga chhunga flagship programme ber hlawhtlinna sawi tur nei lo hian eng chhuanlam nge an neih? Kan CM sawi anga IAS hoin bàn an duh hialna tur khawpa ruahmanna felfai an neih lohzia a tilang chiang hle," a ti.

Chief minister Zoramthanga'n June 2019-a session-ah MNF sorkar flagship programme-ah rua chìn a nih thu a sawi tih sawiin Vanlalthlana chuan, "Sum tam tak sên a nih hnuah a hlawhchham tâk em avangin, kar leh maia inthlanna kan neih turah MNF campaigner tu mahin rua an sawi chhuak ngam tawh lo," a ti a; raw chìn chungchangah hlawhtlinna sawi tur an neih loh thu a tarlang.

Dr Vanlalthlana chuan, Horticulture department-in family oriented SEDP dawngtute hlawhtlinna an tarlanna lehkhabu, 'SEDP Lawmna Thangkhâwk’ an tihchhuahah dragon fruit, lakhuihthei, khanghû leh a dangte tàrlan a nih hnuah, a tàwp berah Khawzawl lama rua chíngtu hlawhtling tarlan a ni tih a sawi a, "Rua chíng hlawhtling pakhat chauh tarlan a nih laiin, rua chíngtu hian kum 2013 daih tawh khan a lo ching tawh a ni," a ti.