Postal ballot hmangin vote thlak mek

Nimin khan district hrang hrangah MLA inthlanpuia duty turte'n postal ballot hmangin vote an thlak a; district ṭhenkhatah kum 80 chung lam leh pianphunga rualbanlote vote thlaktir an ni bawk.

Mamit district-ah nimin khan home voting ṭan a ni a, kum 80 chung lam leh rualbanlote an ina vote thlaktirtu turte chu DEO VL Remliana'n DC pisa tual aṭangin a vailiam. Mamit district-ah hian in lama vote thlak tur rualbanlo mi 23 leh kum 80 chung lam mi 23 an awm a ni.

Nimin khan Aizawl district-a inthlan vote thlâk nia duty tur polling official-te'n postal ballot hmangin vote an thlâk a, vote thlakna hmun hi Mizo H/S Indoor Stadium, ATI Auditorium, IPR Auditorium, SCERT Hall leh PUC-ahte siam a ni.

Aizawl district-ah hian venhim hna thawk tur police-te chuan October 30-31 khan Mizo H/S Indoor Stadium-ah vote an thlak tawh a; vawiin hian DC office-a Postal Facilitation Centre-ah vote thlak leh a ni ang.

Aizawl district-ah hian October 30 aṭangin home voting kalpui ṭan niin, la kalpui mek zel a ni a, mi 1,242-in vote an thlak tawh a ni.

Lawngtlaiah pawh nimin khan district chhunga vote nei election official duty turte'n vote an thlak a, November 3, 2023 chhun dar 12 thleng vote thlak a ni dawn. Khawzawlah pawh election official duty turte'n postal ballot hmangin vote an thlak mek zel bawk.