KHAWTHLIR

Rs 39,40,96,333 hû thil man tawh

Mizoram MLA inthlan hun tur October 9, 2023-a puan a nih aṭanga October 31, 2023 thleng khan Model Code of Conduct bawhchhiatna hrang hrangah Rs 39,40,96,333 hû thil man a nih tawh thu Chief Electoral Officer pisa chuan an tarlang.

Chawlh puang

Mizoram MLA General Election vote thlak ní, November 7, 2023 chu sorkar hnathawk leh central/state public undertaking, bank leh zirna-in a thawkte'n vote an thlak ṭheuh theih nan Mizoram sorkar chuan chawlh (public holiday)-ah a puang.

Dawr enfiah

Taxation department Serchhip Zone-a thawktute chuan nimin khan Thenzawl khaw chhunga dawr lian hrang hrangah inthlan kaihhnawih dan bawhchhiatna a awm leh awm loh an enfiah. Enfiahna hi Election Commission of India-in a phût anga kalpui a ni a; MLA inthlanpui denchhena political party-te'n sumdawngte kaltlanga dawr bungruate campaign-na atana an hman awm palh thei vênna tura ruahman a ni.

Video tlangzarh

Mizoram ṬKP-in Mizoramah rorelna dik a awm theihna tura inzirtirna video clip pathum an buatsaih chu October 31, Thawhlehni zan khan BCM Hall, Serkawnah BCM general secretary Rev. R Lalbiakliana'n Pathian hnenah hlanin a tlangzarh. Video clip-te hi MṬKP Media Cell, Zobawk Trinity Unit leh Venghlun Unit-te siam a ni.

Energy Club din

Mamit district-a sikul 20-ah Power & Electricity department kaltlangin nimin khan energy renchem chungchang inzirtirna tur energy club din a ni. Sikul 20 hnenah hian pawisa, LED bulb, LED tube leh hmanraw hrang hrang pek a ni a; sikul pakhatah mawhphurtu zirtirtu pahnih ṭheuh awmin, an pualin IPR conference hall-ah training buatsaih a ni.

Kawng khâr dawn

Meidum leh Hortoki inkar kawng chu November 1-30, 2023 chhungin thawm ṭhat hna thawh a ni dawn a, hei vang hian hna thawh hun chhungin chawlhkar tin Thawhlehni leh Inrinni inkarah kawngpui khâr a nih dawn thu Kolasib SP-in a tarlang.