Kohhran 168-in hmunhma phal
Task Group on Quarantine Facilities chairman Esther Lal Ruatkimi chuan nimin khan thuchah a tichhuak a; Covid-19 vanga ramin harsatna a tawh mekah Mizoram sorkar chuan task force leh kohhran hrang hrangte leh, mipui hnenah lawmthu a sawi tih a puang. Tualchhung kohhran hrang hrang 168-in an hmunhmate quarantine centre atan hman an phal tawh tih a sawi bawk.
Esther Lal Ruatkimi chuan, tunah hian Mizoram páwn aṭangin mi sing khat chuang Mizorama rawn haw tur an awm mek thu sawiin, "Mizoram pumah quarantine facility hrang hrang mi 20,000 len theihna mamawh a nih laiin, tunah hian mi 14,358 len theihna kan nei mek. Sorkar building hrang hrangte bakah, kohhran hall leh sikul hrang hrangte quarantine facility atan hman mek a ni a, dap belh mek zel a ni bawk,'' a ti.
Esther Lal Ruatkimi tarlan danin, tunah hian Presbyterian Kohhran, Baptist Kohhran, Salvation Army, Lairam Isua Krista Baptist Kohhran, Evangelical Church of Maraland, United Penticostal Church (NEI) leh United Penticostal Church (Mizoram) hnuaia kohhran hrang hrang 168-in an kohhran hall hman an remti tawh a; kohhran
ṭhenkhatin centre-a awmte tan ei leh in an tumsak. Hotel-a man chawia mahni intuma inkhung hrang mek an awm bawk.
State páwna Mizo tangkhang lo haw, screening test paltlang tawh, mahni ina pindan hrang leh inthiarna hrang nei thei tan home quarantine theih a ni a, mahni khua/venga task force-te remtihna a ngai thung. Home quarantine duh chuan mahni awmna DC-ah dilna thehluh tur a ni.