Aizawlah thlawhtheihna thlâwk lo A service ṭan hun tur hriat a ni lo

Covid-19 vanga thlawhtheihna service tihtàwp a nih hnuah, May 25, Thawhṭanni aṭangin ram chhung hmun ṭhenkhatah thlawh ṭantir leh a ni a; Aizawl (Lengpui Airport)-ah pawh nimin aṭanga thlawk ṭan tura ruahman a ni. Nimahsela West Bengal sorkarin Kolkata-ah thlawhtheihna thlawh chhuah leh ṭum a remtih loh avangin Aizawlah rawn ṭum a awm lo a; thlawhna service ṭan theih hun tur pawh hriat a la ni lo.

GAD (Aviation Wing) principal consultant Wg.Cdr. J Lalhmingliana hnen aṭanga Vanglaini thu dawn danin, Ministry of Civil Aviation chuan May 24 aṭangin thlawhtheihna thlawk leh turin ruahmanna a siam a, thlawhtheihna thlawh dan tur pawh siam vekin, airline-te pawh a hriattir tawh. Ruahman dan chuan, Lengpui Airport-ah chuan May 26, 27 leh 28-ah thlawhtheihna rawn ṭum tura tih a ni.

Hetih lai hian, state ṭhenkhat chuan thlawhtheihna service tir chu a la hun loah ngaiin an sawisel. West Bengal chief minister Mamata Banerjee chuan, thlipui (cyclone)-in a nuai avanga an state-in harsatna an tawh lai leh airport pawh a nuai chhiat laia thlawhtheihna thlawhtir chu ṭha a ti lo a; West Bengal-ah May 30 thleng thlawhtheihna luh leh chhuah ṭha an tih loh thu Ministry of Civil Aviation-ah a thlen a ni.

Hemi hnu hian thuneitute chuan, West Bengal-ah thlawhna lut leh chhuak tur chu May 26 leh 27 atan an titawp phawt a, chumi hnuah May 28 pawh an titawp leh ta a ni. Hei vang hian engtikah nge Lengpui Airport-ah thlawhtheihna a thlawh ṭan dawn tih hriat theih a ni lo.