Eng ang pawhin laklawh palh se BJP nen sorkar siam kan tum lo - ZPM Working President
ZPM working president K Sapdanga chuan, eng ang pawhin laklawh palh se, BJP nen sorkar siam an tum loh thu a sawi a; ram rorelnaa Pathian ram tung ding tur leh tih tak zeta ṭawngṭaia vote thlak turin mipui a sáwm.
K Sapdanga hian nimin khan Aizawl Press Club-ah thuthar thehdarhtute kâwmin, mipui tam berin ngaihdan an siam tawha a hriat thu a sawi a, "Mipuite'n sorkar hmel thar hmuh an nghahhlelh chhan hi kalphung thar mipui sorkar enchhin an duh a ni. Mipui tinzawn hi sorkar inṭâwm, coalition sorkar a ni lo a, jentail-te nena inpawlh sorkar phei chu an tinzawn lo lehzual," a ti.
ZPM Working President chuan, MLA an neih zat chu eng ang pawhin laklawh se, BJP nen sorkar siamho an tum loh hul hual thu a sawi a, "Ram rorelnaa Pathian ram tun din intiam, eirûkna laka fihlim tura intiam ngam awm chhunte hi a hlanga mipuiin sorkar siam tura enchhin an duh niin kan hria," a ti a, mipui duh dan tihhlawhtlin an tum thu a sawi.
K Sapdanga chuan, ZPM party hotute leh an candidate-te chu a zei ber ber an ni lo tih sawiin, "Thawk rim ber erawh kan ni tih mipuiin min pawmin kan hria. Hnehna erawh Pathian kuta awm a ni. Mipui hian an beisei party mal sorkar chu an vote chhuak ngei dawn pawhin a lang," a ti.
Mizorama MLA inthlanpui a awm apiangin, mipui hriat thiam turin politics thli a tleh ziah nia sawiin Sapdanga chuan, "Thli kengtu party apiang hneh takin an tling mai ṭhin. Majority sorkar din tham an awm rin loh thu hi a ri ve ziah a, hetiang sawi ṭhintute hi a chak lo lam an ni ziah," a ti a, an khingpuite pawhin ZPM chu thli kengtuah an puh rawn niin a sawi.
ZPM Working President chuan, NDA sorkar, NEDA sorkar ni bawkin sorkar commando hmangin Zo hnahthlakte rálpui beihin an bei nia sawiin, "Kan farnute saruaka an chaih a, nawmsip bàwlna atan mualpho thei ang berin an hmang a, kan sakhaw hmun thianghlim lai apiang an bitum chat chat mai hi a runthlak zozai hle," a ti.
Mizoramah ZPM sorkar a din hnuah NEDA hoin Zo hnahthlakte an la sawisa zel a nih chuan hma an lak tur thu sawiin Sapdanga chuan, "Ràlkhat aṭanga kut kuangkuaha thlir ngawt kan tlin lo ang," a ti a, a hen tâwk tala thlavang an hauh dawn thu a sawi.
K Sapdanga chuan, MNF sorkarin Zo hnahthlakte ṭha taka a pui ṭhin chu lawmawm an tih thu sawiin, "Lehlamah hliam tawrhtirtute thâ tichak zawnga an ṭang tlat erawh kan hrethiam thei lo. 'Nangni'n dim miah loin han sawisa u la, keini'n hmangaih àwm takin an hliamah damdawi kan lo hnawih ang e,' tia inremsiamte pawh an ang kan ti," a ti.