MNF sorkar chhunga hna lakah sawisel tur a awm lo - MNF Ṭhalai

Mizo National Youth Front (MNYF) hruaitute chuan nimin khan Aizawl Press Club-ah thuthar thehdarhtute an kâwm a; MNF-in kum nga chhunga hna an lakah sawisel tur a awm lo a, party induhsak bikna awm loin sorkar hnathawk tur lak a ni ṭhin niin an sawi.

MNYF vice president Zodinpuia chuan, December 15, 2018-a MNF sorkar a din hnuah hna hrang hrang lakah party induhsakna awm loin, a tling leh tlâkte lâk an nih ṭhin thu a sawi a, "Tun kum nga chhunga MNF sorkar hnuaia hna lakah sawisel tur a awm lo," a ti.

Kumin inthlanpuiah MNF-in sorkarna an chan tûk aṭangin SEDP an sem chhunzawm dawn nia sawiin Zodinpuia chuan, "Ṭhalaite pualin Youth Oriented SEDP ruahman a ni a, ṭhalai mimal leh ṭhianho, mahni kutkawiha eizawnna kawng zawh duh tan sorkarin ṭanpuina a pe dawn," a ti a, ṭhalaite tan ke an pen zel dawn niin a sawi.

Zodinpuia chuan MNF sorkarin zirlai leh ṭhalaite hmakhua a ngaihtuah avangin June 10, 2019-a Council of Minister ṭhutkhawmah MSSSB dinna tur pawm a nih thu sawiin, "MSSSB hian kum 2021 aṭangin direct recruitment exam a buatsaih ṭan a, vawiin thlengin MSSSB in hnalak a kalpui tawhnaah sawiselna thâwm a awm hriat a la ni lo. A tling leh tlakte chauh lak an ni ṭhin," a ti.

Zodinpuia chuan, central service leh all India service-ah Mizo ṭhalaite an luh tam theih nan MNF sorkarin theihtawp a chhuah niin a sawi a, "Mizo ṭhalaite IAS coaching pein, senso zawng zawng a tumsak a, heng hi India ram state danga thil thleng zen zen lo a ni. MNF sorkar hmalakna avang hian Mizoramin hun rei tak a tawn tawh loh UPSC main exam paltlangte kan awm leh tawh," a ti.

MNYF tarlan danin, MNF sorkar kal mekah MSSSB-in direct recruitment-in mi 243, limited departmental examination-ah mi 288, departmental exam-ah mi 216, promotion-in mi 2,906, reguralisation mi 122, confirmation mi 1,366, conversion mi 47 leh absorbtion mi 43, a vaiin mi 5,231 hna tihfel a ni.

MPSC hnuaiah post hrang hrang 81 atan hna thar lak a nih thu leh kum thar atan hna thar lak tur hrang hrang an buatsaih tawh thu an sawi bawk.