Ram, hnam, sakhua a him loh chuan hmasawnnain awmzia a nei lo - MPCC

MPCC Media hotute chuan nimin khan Aizawl Press Club-ah thuthar thehdarhtute an kâwm a; Mizo hnam, ram leh sakhua a him loh chuan hmasawnnain awmzia a nei loa an ngaih thu an sawi.

MPCC Media member David Zochhuanmawia chuan, Congress party ngaih pawimawh ber chu ram, hnam leh sakhaw himna a nih thu a sawi a, "Hengte hi a him lo a nih chuan hmasawnna hi awmze nei loah kan ngai. Mizo Kristian tana hlauhawm em em chu Hindutva ideology kalpuitu BJP an ni. India ram Hindu rama din tum burtute hi Congress party chuan vulh len tum chi-ah a ngai lo," a ti.

Political party zingah BJP-te nena inmawng zawm hreh lo an awm nia sawiin David Zochhuanmawia chuan, "Pawi kan ti hle. Heng party-te hian ram leh hnam hralh an pawiti hauh loah kan ngai," a ti a; BJP-te'n anmahnia kua an hreuh theih lohna tur nia an hriatah chuan tualṭo party-te thawhpuiin, sorkarna chang angin an intarlang ṭhin niin a sawi.

MPCC Media hotute chuan, ZPM leader Lalduhoma chu BJP nen inlaichìnna neiah puhin, inlaichinna an neih chu thil thar a ni lo niin an sawi a, "March 2014 daih tawh khan Pu Lalduhoma leh BJP hian thawhhona thuthlung an ziak tawh. Kum 2015 kuma AMC election leh Aizawl North-III by-election ah Pu Lalduhoma leh a hote chu NDA candidate angin election an lo hmachhawn," an ti.

Phone call darh aṭangin Lalduhoma'n BJP a thawhpui hreh loh thu leh Mizorama BJP an len theihna tur dâltu lian tak chu MNF an nih thu a sawi nia sawiin MPCC Media chuan, "Tun hnai lawkah mi náwlpui hriat lohin Guwahati lamah zinin, thawhpui turte nena inbiaknate a rûka nei nia sawi a ni," an ti bawk.

MPCC MEDIA TARLAN DANGTE

▶ BJP-in NDA-a rei tak an thawhpui tawh MNF hi sorkar siampui theih tura an ngaih loh avangin MNF thlakna tur atan regional party dang ZPM an bêlbul.

▶ Zawi zawia MNF thlauhthlain ZPM chu thawhpui theih zawka an ngaih avangin BJP hian ruahmanna fel tak an neiin a lang.

▶ MNF leh ZPM hian NDA/BJP-a tlatlum zawk nih an inchuh mek.

▶ MNF leh ZPM-te hi mipui hriatah a hmingin inbei ve bawk ṭhin mahse blood group pakhat nei an nih avang leh hmân aṭanga lo thawkho ṭhang an nih avangin an tan sorkar inṭâwm siam turin ṭhian hlui chaw ei khawm ang chauh an ni dawn.

▶ RSS/BJP leh an Hindutva politics a tir aṭanga dodal tluan chhuak chu Congress party chauh a ni.

▶ Ram, hnam, sakhua a him zel theih nan leh ram sum leh pai enkawlna mumal zawk neia hmasawnna rahbi kan rah theihna turin Congress party dinna leh hmachhawpte a rintlak.