Sports Acedemy-a phûllem phah tur YMA leh LC-in dah lêt turin sorkar phût

YMA Sub-Headquarters, Lunglei chuan, State Sports Academy, Zobawka phah tur phûllem phurh thlen tawh, hmun danga phah tura phurh chhuah leh a ni chu an duh loh thu an tarlang a, dah lêt leh ngei tur leh, dah lêt a nih loh chuan phûllem ṭha phah a ni ngei dawn tih intiamna lehkha pe turin thuneitute an phût.

State Sports Academy-a phah tur phûllem (astro turf) phurh chhuah leh a nih chungchang hi November 1, (Nilaini) khan Zobawk Zopui Hall-ah sawiho a ni a; YMA Sub-Hqrs hruaitute bakah, Zobawk Group leh Zobawk Joint YMA hruaitute leh, Zobawk North leh South local council chairman-te an tel.

Lunglei Sub-Hqrs YMA tarlan danin, State Sport Academy football khelmuala phah tur phûllem chu hmun danga hman turin phurh chhuah a ni a; an phur chhuak lai Zobawk mipuiin an hre mai lo a, an hriat veleh phullem leh bungraw dang dahnaah an kal nghal a ni. Marble chip leh rubber chip phurh chhuah tura an tih chu phurh chhuah an phal lo a, phullem erawh chu an dang hman lo.

Phûllem lak chhuah chu Rajiv Gandhi Stadium leh futsal ground hrang hranga phah turin lak chhuah a nih thu leh, State Sport Academy-ah hna thawh chhunzawm theih a nih veleh phûllem thar hman a nih tur thu an hre zui a ni. State Sport Academy-a hmalakna kal mek chu National Green Tribunal-ah thubuai a awm avangin chawlh lailawk (stay) rih a ni.

Lunglei leh Zobawk YMA-te leh Zobawk LC-te chuan, phûllem phurh chhuah tawh chu State Sports Academy-ah dah lêt turin thuneitute an phût a; hmun dangah an lo hmang hman tawh a nih chuan, State Sport Academy-ah phûllem ṭha leh rintlak phah ngei a ni dawn tih intiamna lehkha pe turin sorkar thuneitute an phût a ni.

An thil phûtah hian November 7, 2023 ral hmain chhanna hmuh an inbeisei thu an tarlang bawk.