Scholarship sum dawn tawh, thla khat hnuah la pe chhuak lo

Sorkar laipuiin Mizoram sorkar hnena September 25, 2023-a zirlaite scholarship second instalment tur cheng nuai 1,875 a pek tawh chu thla khat chuang a ral hnu, nimin thleng khan zirlaite hnenah pek a la ni lo.

Scholarship chungchangah hian Aam Aadmi Party (AAP) zirlai pawl, Chhatra Yuva Sangharsh Samiti (CYSS) Mizoram chuan Mizoram sorkar an dem thu an tarlang.

September 25, 2023 khan sorkar laipui aṭangin Mizoram sorkarin zirlaite scholarship second installment tur Rs 18,75,00,000 a dawng tih sawiin AAP zirlai pawl chuan, "Central danah chuan ni 30 ral hma ngeia sem chhuah tur a nih laiin Mizoram sorkarin a la hup bet tlat a, Mizoram sorkar chêt dan hi kan dem hle," an ti.

CYSS chuan nimin khan zirlaite scholarship chungchangah Finance additional secretary Ramchuana chu a pisaah an kawm thu an tarlang a; Finance Additional Secretary chuan inthlan hmain scholarship sem chhuah hman a nih loh tur thu leh inthlan zawh lamah pek tuma theihtawp an chhuah thu a lo hrilh tih an sawi.

AAP zirlai pawlte chuan, scholarship sem thuai a nih theih nan hmalak chhunzawm zel an tum thu tarlangin, a rang thei ang bera scholarship sem turin Mizoram sorkar an phût a ni.