Inthlan tluang tak leh muanawm taka a kal theih nan ECI-in state-te ramri veng ṭha turin a chah
Election Commission of India (ECI) hotute chuan nimin khan tun hnaia state assembly inthlanpui nei tur Mizoram, Chhattisgarh, Madhya Pradesh, Rajasthan leh Telangana-te bakah an ṭhenawm state 12 hotute chu video conference kaltlangin an kâwm a; state ramri kaltlanga thil ṭha lote tawlh a nih loh nan khauh taka ramri veng turin an chah.
ṭhutkhawmah hian chief election commissioner (CEC) Rajiv Kumar bakah, election commissioner pahnih Anup Chandra Pandey leh Arun Goel te an tel a; Mizoram aṭangin chief secretary Dr Renu Sharma hoin CS conference hall aṭangin sorkar thuneitute an tel bakah, tel tura tih state-te aṭangin sorkar officer-te an tel a ni.
ECI hotute chuan, inthlan hmachhawn mai tur state-te'n harsatna lian tham an nei lo leh ṭhenawm state-te nen thawhhona ṭha tak an nei chu lawmawm an tih thu an sawi a; vote zawnna hmanraw ṭha lote do tlân a ṭul thu sawiin, ramri kaltlanga dan loa ruihhlo, bungrua leh hmanraw dang tawlh awm theite véng ṭha tur leh state ramrite khauh taka véng turin an chah.
State sorkar hotute chu inthlanna muanawm, dik leh langtlang, hlawhtling leh entawn tlak lantir tum turin ECI hotute chuan an chah a; buaina leh tharum thawhna a awm loh nan leh vote tla a ṭhat theih nana ṭhahnemngai taka hma la zel tur te, vote thlak nawn (re-poll) a awm loh nan ṭha taka hma la turtein an chah bawk.
Chief secretary Dr Renu Sharma chuan, ECI duh dan leh inkaihhruainate zâwm chungin inthlan atan inpuahchah mek zel a nih thu a sawi a; Mizoram chu state ralmuang a nih thu sawiin, "Tun dinhmunah dan leh thupek kenkawh kawngah harsatna lian tham a awm lo a, ṭhenawm state Assam, Manipur leh Tripura thuneitute nen inbiakpawh tawn reng a ni," a ti.
Renu Sharma chuan, Mizoram state ramrite ngawrh taka vên a nih thu leh campaign tàwp hun aṭanga inthlan zawh fel thleng ramri khâr tlat tum a nih thu a sawi bawk.
Mizoram DGP Anil Shukla pawhin thu sawiin, inthlanna muanawm leh felfai neih a beisei thu a sawi a; venhimna ṭha lehzual a awm theih nan central armed police force (CAPF) mamawh belh a nih thu a sawi bakah, inthlan puan hnua enforcement agency-te hmalaknate a sawi lang a ni.
Inkawmhona hi inthlanna muanawm, felfai leh langtlang neih a nih theihna atana hmalakna a ni a; inthlang mai tur state bakah, an ṭhenawm state kaltlanga dan loa thil tih dona tura thawhhona ṭha zawk a awm theih nana ruahman a ni.
Vote zawn nan sum, ruihhlo leh therhlo dangte a hluar loh nan ramri vên uluk a ṭul thu tarlan a ni a; state 12 chief secretary-te leh DGP ten inthlan kaihhnawiha an inpuahchah dan te, mamawh leh hmachhawp an neihte an tarlang bawk.