Niminah mi 79 sample endik

Zoram Medical College (ZMC) Covid-19 Laboratory-ah nimin khan mi 79-te swab sample endik a ni a, result erawh hriat hman a ni lo. Hetih lai hian, May 25, Thawhṭannia mi 17-te sample endikte chu nimin khan an result a chhuak a, Covid-19 an vei lo vek tih finfiah a ni.

State Referral Hospital (SRH)-ah nimin khan Covid-19 kai rinhlelh thilah rapid antibody test (RAT)-a reactive (positive) mi pahnih dah luh an ni a, pakhat chu Mizoram páwn aṭanga rawn haw niin, pakhat zawk chu driver a ni. An pahnih hian nimin khan swab sample laka endik a ni a, result kan hre hman lo.

SRH-ah hian mi pakua an awm mek a, chu'ngte chu Risk Ward-ah pathum, Make Shift ICU/SARI Ward-ah pakhat leh Holding Ward-ah panga an awm.

May 25, Thawhṭanni tlai dar 5 leh nimin tlai dar 5 inkarah Mizoram ramria screening point hrang hrangah mi 441 enfiah (screen) an ni a, RAT hmanga endik mi 137 an awm. Quarantine centre-a dah luh thar mi 107 an awm a, mahni ina inkhung hrang (home quarantine) thar mi 19 an awm bawk.