November 5 tlaiah campaign hun a tâwp dawn; Nov. 7-30 chhung exit poll khap

November 7, 2023, Thawhlehnia Mizoram Legislative Assembly inthlanpui neih tura campaign hun chu naktuk Pathianni tlai dar 4-ah a tàwp dawn a, a hnu lamah campaign phal a ni tawh dawn lo. Inthlan nía vote thlak ṭan hun aṭanga November 30, 2023 tlai dar 6:30 thlengin eng hmanrua pawha exit poll neih leh result puanzar khap a ni.

Kalphung pangngai angin, inthlan campaign theih hun hi inthlan vote thlak tawp hun darkar aṭanga chhiar lêta darkar 48-naah a tawp ṭhin a, chu chu naktuk Pathianni tlai dar 4 a ni. November 5, Pathianni tlai dar 4 aṭanga vote thlak hun tàwp, November 7 tlai dar 4 thleng chu silent period tih a ni a; inthlan kaihhnawih thila vantlang inkhawm te, inthlan kaihhnawih thil media-a tihchhuahte phal a ni lo.

Silent period chhungin candidate-te leh anmahni puitu party worker-te chu an awmna constituency ni lo, constituency dangah awm phal a ni lo a, campaign-na aṭangin haw vek tawh tur a ni. Silent period chhung hian inthlan kaihhnawiha mipui ngaihdan lakna (opinion poll) thil reng reng media-ah tihchhuah khap a ni bawk.

Silent period chhung hian flying squad, static surveillance team leh team dangte'n dan bawhchhiatna a awm leh awm loh an vil dawn a; Media Certification & Monitoring Committee-te'n media leh social media-te ngun takin an vil dawn a ni.

Dan bawhchhiate chu kum hnih thleng lung-ina tàntir emaw, pawisa chawitir emaw, a pahnih emawa hrem theih a ni a; candidate leh political party-te chu ṭha taka silent period zâwm tur leh dan bawhchhe lo tura inruahman lâwk tura chah an ni.

Hetih lai hian, inthlan ní November 7, 2023-a vote thlak ṭan hun aṭanga November 30, 2023 tlai dar 6:30 thleng exit poll neih leh result puanzar khap a ni.

Inthlanpui (general election)-ah chuan Election Commission of India (ECI)-in hun khata inthlan a puanna state/union territory-ahte vote thlak ni hmasa bera vote thlak ṭan hun darkar aṭangin exit poll khap hun a inṭan a, vote thlak tàwpna ber state/UT-a vote thlak tàwp hnu darkar chanve thleng a huam.

ECI-in October 9, 2023-a Mizoram inthlanpui hun a puan rual khan Chhattisgarh, Madhya Pradesh, Rajasthan leh Telangana state assembly inthlanpui neih hun tur a puang a; heng state pangaah hian vote thlak ṭan hun aṭanga vote thlak hun tàwp hnu darkar chanve thleng exit poll khap a ni.

State panga zinga inthlang hmasa ber tur Mizorama vote thlak ṭan hun, November 7 zing dar 7 aṭanga vote thlak hnuhnung ber tur Telangana-a vote thlak hun tawp - November 30, 2023 tlai dar 6 hnu, dar 6:30 thlengin print/electronic media emaw, eng hmanrua hmang pawha inthlan kaihhnawih exit poll buatsaih leh result puanzar a khap a ni.