Mizo nula bo thiin hmuh a ni

Lalnunthiangi (33) d/o Vanlalnghaka (L), Mission Veng, Thapar Institute of Engineering & Technology (University) Patiala, Punjab-a Ph.D ti lai chu October 28, 2023-a a bo hnuah November 2, Ningani zan dar 11 vel khan Tohana Canal-ah thia hmuh a ni. Nimin khan a ruang endik a ni a, Mizoramah rawn phurh haw tum a ni.

Tarlan tawh angin, Lalnun­thiangi hi Thapar University-ah Biotechnology-a Ph.D ti mek a ni a, October 28, 2023 chhuna a ṭhiante nena an chhuak chu inah haw loin a bo zui a ni. October 29 chawhma dar 10 velah Patiala-a tuikawng, Bhakra Canal bulah a bag, identity card leh thawmhnaw ṭhenkhat chhar a ni a, police station-ah hriattir niin, Patiala police-te'n an chhui zui nghal a ni.

November 2, Ningani zan dar 11 vel khan Bhakra Canal nena inzawm Tohana Canal, Haryana-ah ruang chhar a ni a, a hnuah Lalnunthiangi a ni tih finfiah a ni. Ruang dang pathum chhar a ni bawk a, a ṭhiante ruang a nih leh nih loh erawh hriat theih a ni rih lo.

Lalnunthiangi ruang hi nimin khan damdawi-inah endik a ni a, Mizoramah thawn haw tura ruahman niin, a rawn thlen hun tur hriat theih a ni lo a, TT Zothansanga, Mission Veng inah lâk a ni ang.