MNF/INC party thu dik lo thehdarh âwih lo turin ZPM-in mipui an chah

ZPM party hruaitute chuan nimin khan Aizawl Press Club-ah thuthar thehdarhtute an kâwm a; inthlan a hnai tial tial a, Congress leh MNF party-te'n mipui sûkthlêk tihdanglam tumin thu dik lo an thehdarh nasa tih sawiin, tun aia nasa zawka an la thehdarh theih avangin, lo âwih lo turin mipui an chah.

ZPM PAC member TBC Lalvenchhunga chuan, "Thu dik lo thehdarh hreh lo MNF leh Congress-te hian thlalak, video, thuziak leh thil dangte hmanga mipui sûkthlêk tihdanglam tumin, ZPM an chak chuan BJP nen an inzawm dawn tia dâwt hmanga thu an thehdarh aia nasa hian thu an rawn thehdarh mai thei a, lo âwih lo turin Zoram mipui kan ngen lâwk a ni," a ti.

TBC Lalvenchhunga chuan, ZPM chu BJP nena thawk dun tur angin an khingpui party-te'n an rin thu nen an bei nasa tih sawiin, "Kan hotute'n an sawi chiang viau tawh. Chiang taka kan sawi nawn leh duh chu, BJP nen hian kan thawk dun dawn lo tih hi a ni," a ti a; BJP nena thawk dun chu MNF an nih thu leh NDA aṭanga inhnûkdâwk ngam lo an nih thu a sawi.

Aizawl West-II biala ZPM candidate Lalnghinglova Hmar chuan, ZPM leh BJP thawkho tur anga sawi chungchangah, "Ziak emaw, thlalak emaw finfiahna hmuh tur awm si lo, rin thu nen mipui rilru hruai kâwi nan min puh lui mai mai a ni. Ni lo na nâ nã chu inpuh lo ila, kan tih turte hi sawi mai ila," a ti.

Zawhna chhángin Lalvenchhunga chuan, ZPM leh mipui rilru leh mitthlaah sorkar inṭâwm a awm lo tih a sawi a, "ZPM hi sorkar siam turin kan inbuatsaih. Sorkar inṭawm siam hi Zoram mipui mitthlaah a awm lo a, ring lo mite nena sorkarna inṭâwm siam phei chu an mitthlaa awm a ni lo lehzual," a ti a; nasa taka beih rawn karah ZPM-in hma an sawn zel avangin thlamuang taka awm turin mipui a chah.

ZPM PAC member chuan, MNF chu ram lei lung fate duhsak tura insawi ṭhin leh hnam rilru pua inchhál an nih thu sawiin, "MNF hi tunah chuan an pu ber hian a lêrah hnam dang kan ram sum leh pai a tlanpui a, hnam a phatsan tawh a ni. In biala MNF candidate a fel viau a ni mai thei a, i thlan tlin chuan Abu Mazumdar, Kamrul leh an phêna ding Pu Zoramthanga te duh tâwka tâl zel turin i thlang tling tihna a ni," a ti.

TBC Lalvenchhunga chuan, Congress party-in ZPM an puhna hrang hrangte chu chhàn tlaka an ngaih loh thu sawiin, "Tun inthlanah hian ZPM hmanga contender anga mipui hmuha inlantir a, tel ve hrâm an tumna hmanraw chi khatah kan ngai," a ti. MNF-in tlaikhawhnuah Youth Oriented SEDP an sawi thu sawiin, "Chauhthubarawh mai a ni. Kum nga chhunga an hmuh hmaih ṭhalaite ngaihtuah thar thut anga an lan lehna chhan hi ṭhalaite'n an hrethiamin kan ring," a ti bawk.

ZPM general secretary Eddy Zosangliana Colney chuan ZPM candidate zinga criminal case neite chungchang a sawifiah a; Tuichawng biala an candidate Shanti Jiban Chakma chu CADC CEM a nih laia thil thlengah CEM a nih avanga thubuaia hming lang ve a nih thu leh thil serious a nih loh thu a sawi.

Lunglei North-a an candidate V Malsawmtluanga chu August 16, 2016 zana Aizawla lirtheia an chetsualnaah thi an awm avanga kalphung pangngai anga case ziah luh a nih thu leh K Sapdanga leh Lalnghinglova Hmar te chu chanchinbua party symbol dah sual palh vang a nih thu a sawi a, "Case serious a ni lo," a ti.