MNF an sorkar zel chuan kan hmabak a thim hle dawn - MPCC

Mizoram Pradesh Congress Committee (MPCC) Media department hotute'n nimin khan Aizawl Press Club-ah thuthar thehdarhtute an kawma; Congress pary-in an sorkar chuan ṭhalaite tan hna nuai khat siam an tum thu leh MNF an sorkar zel chuan Mizoram hmabak a thim thu an sawi.

MPCC Media chairman Lalremruata Renthlei chuan, Mizoramah hna a vàn avangin ṭhalai tam takin state páwnah hnate an thawk tih sawiin, "Ram páwna ṭhalaite chhuah chhan lian tak pakhat chu kan rama hnathawh tur mumal awm loh vang a ni. Mizo ṭhalaite'n ram páwna hna an thawhnaah harsatna lian an tâwk fo," a ti.

Lalremruata Renthlei chuan, Dubai leh Singapore-ah Mizo nula leh tleirawl, manganga mi eng emaw zat an awm chhan chu Mizoram sorkar inrêlbâwlna a mumal loh vang a nih thu leh ram páwna hna zawn ngai lo thei loa an awm vang a nih thu te, dan loa inthawn chhuah leh document lem siam chungchangah MNF sorkarin hmalakna mumal a neih loh thute a sawi.

MNF-in an thil tiame mumala an bawhzui loh avangin beiseina nei hleithei loin mipui an awm phah nia sawiin Lalremruata chuan, "An sorkar chhunzawm zel chuan kan ṭhalai, an finna leh thiamnate Mizoram tana hman theih turte an chhuak bo zel ang a, a ṭhen ruihhlo bâwihah an táng chhunzawm zel ang. Kan ram hmabak hi a thim chho hle dawna ni," a ti.

Remruata Renthlei chuan, sorkar thar neih châkin mipui an tuihâl tih sawiin, "Siamṭhat theih a nih beiseiin tute nge mawhphurhna la thei ang tiin ngaihtuahna an séng mek a, siamṭhat hna thawk turin Congress party chuan mawh­phurhna kan la ngam," a ti a; ṭhalaite harsatna awmze neia chinfel dan tur an hriat thu a sawi.

MPCC Media hotute chuan, Congress party an sorkar chuan Young Mizo Entrepreneurship Programme (YmElevate) din a nih tur thu an sawi a, "Ṭhalaite tan startup funds siamin hna nuai khat siam tum a ni. Skill development lamah ṭan lak a ni ang a, Congress sorkar laia din Mizoram Youth Commission pawh tihlena mumal zawka kalpui a ni ang," an ti.

MPCC MEDIA TARLAN DANGTE

* Mizorama ṭhalai hna zawng mi nuai tam tak an awm mek, tun hnai kum 5 chhungin Aizawl ṭhalai 29%-te chu hna nei loa chhût a ni.

* MNF sorkarin kum 5 chhungin ṭhalaite hna 7,983 hmuhsak angin an inchhál a, he thilah hian thu dik tâwk lo a awm. Hna 7,983 pek an tihah hian 4,437 chu department chhunga promotion hmanga lak a ni a, 1,394 chu departmental exam a ni.

* MNF sorkar hian hna 2,218 chauh direct recruitment hmangin an la. Tunah hian Mizoram police-ah ringawt hna ruak 4,194 lai a awm.

* Congress sorkarin a din polytechnic pathum pawh an enkawl chhunzawm thei lo a, faculty a dah thei lo.

* MNF sorkar hnuaiah MNF mi leh sa induhsakna a tamzia kan hria, SEDP hnuaiah zirtirtu 771 an lak pawh MNF mi leh sa vek an ni.

* Kamrul Laskar leh Zoramchhana te duhsak bikna dawnte Zoram mipuiin kan hria.

* MNF sorkarna hnuaiah ṭhalaite ruihhlo bâwihah an táng nasa, ruihhlo a hluar hle.