MNF-in lal hrim hrim châkah ZPM an puh

MNF Media & Publicity department hotute chuan nimin khan Aizawl Press Club-ah thuthar thehdarhtute an kâwm a; ZPM party chu lal hrim hrim châkah puhin, MLA inthlanpui awm tur chu Mizo nationalism leh lal hrim hrim châka tuihâlte inbeihna niin an sawi.

MNF Media general secretary VL Krosshnehzova chuan, MLA inthlana chak tura inbeihna kal mek chu Mizo nationalism leh lal hrim hrim châka tuihâlte inbeihna boruak lian bera an ngaih thu sawiin, "ZPM-te'n a thuam mawi nan ‘Kalphung thar, mipui sorkar’ tiin sawi mawi tum mah se, a chhunga inphûm ru lian ber chu lal hrim hrim châkna vanga tuihâl aw chauh a ni-ah kan ngai," a ti.

ZPM-in kalphung thar an zawrh chu an MLA-te khawsak phungah a lang nia sawiin Krosshnehzova chuan, "An intiam anga awm lo leh an insawi loh ang zela khawsa an nih avangin mipuia an inzawrhna thu ṭha tinréng hi anmahni ngeiin an bawhchhiat tawhte a ni," an ti a, ZPM chu miin an nuihzat mek niin a sawi.

MNF Media GS chuan, MNF chu 'Pathian leh kan ram tan' tia ke pên an nih thu sawiin, "MNF sorkar chuan Mizo nationalism kalsan loin, kan ram, kan hnam leh kan sakhua a dah pawimawh ngar ngar. Hengte tiderthâwng thei zawnga hmalakna awmte a su a, a do ngar ngar ṭhin. Mizo nationalism hi eng dang maha thleng a remti ngai dawn lo," a ti.

Sakhaw himna chungchangah ring lo mite'n an thil tih theihna hmangin Mizote an nêk chêp tial tial nia sawiin Krosshnehzova chuan, "MNF chuan min dotu len leh têt a thliar lo a, huai takin a ding nghet zel. Sakhaw tih bik leh rin bik a nei a, ring lo mite nena ngháwngkawl khat bah tawn a remti lo," an ti a; sorkar laipuia an thawhpuite pawh a ṭul chuan an do zel niin a sawi.

MNF Media hotute chuan, BJP-in sum hmangin miretheite retheihna remchanga hmangin mipui an thlêm mek nia sawiin, "An tana hnawk ber MNF min bei ta ngar ngar. An thil tawktarh hi kan rinna kawnga kan ke pênna tiderthâwngtu lian tak a nih dawn avangin BJP candidate leh an puanhnuai thurualpui ZPM hnâwl tura Mizoram mipuite'n ngaihtuahna kan sên a hun a ni," an ti.

MNF MEDIA TARLAN DANGTE

▶ Zu chungchangah kohhran duh dan angin huai takin sum tam tak hloh huamin MNF sorkar a pên a, kohhrante duh dan ngaichâng zelin a kal zel dawn.

▶ MNF chuan Zo fa hmun tina awmte hui khawm zawng leh an thlavâng hauhin a pên a, ramri hmanga ṭhendarha kan awm tawh pawh thinlunga insuihkhawm turin theihtawp a chhuah.

▶ Myanmar leh Bangladesh aṭanga raltlan kan unaute India sorkarin thawn let tura min tihna karah an thu zâwm loin kan hum.

▶ Zo fate inpumkhat nan chak takin hma a la zel.

▶ Pi leh pute aṭanga kan luah ṭhin ram humhalhna kawngah sorkar kal tawh zawng zawng thlen chin piah lamah a pên a, a ṭulnain a nan miau avangin silai hmangin ring lo mi BJP kaihhruai Assam sorkar a kap.

▶ Hnam rilru hian MNF bu chhung a luah khat reng a, min petu Pathian hre rengin kan thahrui pawimawh ber a la ni reng.

▶ Vairengte lamah Assam Police-te'n huaisar taka patrolling an rawn neihna ṭhin chu chhuh lêtin, km. 11 chuang fé luah zuiin, venhim hna thawkin duty post a siam.