Thu dik loa puh vangin Mizote'n BJP an hmuh dan a dik lo - Kiren Rijiju

Union minister Kiren Rijiju chuan, Congress party leh party ṭhenkhatin thu dik lo hmanga BJP an puh avangin Mizo mipuiin BJP an hmuh dan a dik loh phah niin a sawi.

Vanglaini palai nen an inkawmnaah Kiren Rijiju chuan, Congress leh party ṭhenkhate'n dâwt hmangin BJP an puh nia sawiin, "Hmarchhak mi, tribal leh hnam tlem zawk zing aṭanga union minister ka nih angin thu dik sawi a ngai a, BJP hi eng nge a nih chiah Mizo mipuiin an hriat a ṭul," a ti.

Kiren Rijiju chuan, Mizote'n Indian Constitution-a dikna chanvo an neih - an nihphung leh nunpungte humhim duhtu leh hum­him theitu chu BJP chauh an nih thu leh an manifesto-ah pawh chiang taka an tarlan thu a sawi.

Mizoramin national resource ṭha tak leh ram mawi tak a neih thu sawiin Rijiju chuan, "Mizoramah BJP-in sorkarna a chang a nih chuan kan manifesto-a kan tarlan angin, Mizo hnam nun ṭha leh rammawi tak hmangin Mizoram hi khualzinte kal khawmna hmunah kan siam ang," a ti.

Kiren Rijiju chuan, Congress party leh tualṭo party-te'n Mizo mipui beisei ang hmasawnna leh danglamna an thlen thei lo nia sawiin, "Mizo ṭhalai thiamna neite pawh hna zawnga state danga an chhuah a ngai. BJP kan sorkar chuan ṭhalaite hnathawh tur kan siam dawn. Mizoramah BJP a sorkar chuan state leh central sorkar inhrethiam takin a thawkho thei dawn a ni," a ti a, sorkar chak tak an din tur thu a sawi.

Mizoramah hma­sawnna leh dang­lamna thlen kawngah Congress leh tualṭo party dangte an hlawhchham tawh avangin thlan tur awm chhun chu BJP an nih thu sawiin Rijiju chuan Mizo ṭhalaite chu Mizoram hmasawnna atan leh Mizo himna atana BJP zawm zel turin a sáwm.

Kum 9 leh a chanve chhung Narendra Modi kaih­hruai sorkar hnuaiah eiruknaa inhnam-hnawih leh hmingchhia minister an awm lo niin a sawi bawk.