AAP-in zirna leh hriselna lam kan ngai pawimawh - Punjab Minister

Punjab state-a Aam Aadmi Party (AAP) kaihhruai sorkara Education minister Harjot Singh chuan, AAP chuan zirna leh hriselna lam an ngaih pawimawh thu sawiin, AAP candidate-te vote turin Mizoram mipui a sáwm.

Harjot Singh hian nimin khan Aizawl Press Club-ah thuthar thehdarhtute a kâwm a; inthlan dawnah sakhuana leh hnam hmanga campaign ṭhin a nih thu sawiin, "AAP a rawn ding a, zirna leh hriselna campaign auhlaah hman a ni. A tirah chuan nuihzat pawh kan hlawh ṭhin a, tunah chuan party dangte pawhin an rawn hmang ve ṭan," a ti.

Delhi chief minister Arvind Kejriwal chu 'Kan hnathawh ṭha in tih chuan min vote rawh u' tia campaign ngam a nih thu sawiin Harjot chuan, "Ani anga campaign ngam hi an awm lo. Delhi-a MLA seat 70 aṭangin 60 a lâkpui thei a ni," a ti a; Delhi sorkarin hna tam tak a siam bakah, agriculture lamah hmasawnna hmuh tur a awm thu a sawi.

Harjot Singh chuan, Punjab-ah pawh AAP-in sorkarna an siam thu sawiin, "AAP kalphung a ṭhat avangin seat 117-ah 92 kan la thei. AAP MLA 92 zinga 40 chu kum 40 hnuai lam kan ni. AAP-ah ṭhalaite tan hmun a awm a, ṭhalaite ngaih pawimawh kan ni," a ti.

Punjab Education Minister chuan, vawi leh khatah sikul zawng zawng siamṭhat theih a ni lo tih sawiin, "Kum hnih thum a ral leh chuan sikul zawng zawng kan siamṭha thei tawh ang," a ti a; Mizoramah sikul a tlem avangin chei ṭhat zung zung a harsat loh tur thu a sawi.

Harjot Singh chuan, Mizoramah AAP-in candidate ṭha tak tak mi pali an neih thu sawiin, Assembly House-a Mizoram hmasawnna atana au tur MLA ṭha tak Mizoramin a neih theih nan AAP candidate-te vote turin Mizoram mipui a sáwm a ni.