KHAWTHLIR

Covid-19 hripui léng leh inkhàrkhip vanga Mizo tangkhang, Delhi aṭanga a thawh khatnaa haw turte chu rél hmangin May 28, naktukah Mizoram pana chhuak tura tih an ni a; Bairabi thleng rélin an rawn kal ang. The Mizo Welfare Association, Delhi leh Mizoram sorkar leh Delhi sorkar hotute ruahman dan chuan, Delhi aṭanga haw turte chuan nan hian  Shramik Special Train buatsaih a ni. Haw turte chu Delhi khawpuia awmte bakah, Chandigarh, Haryana, Himachal Pradesh, Jammu & Kashmir, Noida, Greater Noida, Punjab leh Uttarakhand-a mite an ni.

Salvation Army Youth, Siaha Corps chuan May 25, Thawhṭanni khan Siaha District Hospital blood bank-ah donation camp an buatsaih a, mipa pasarihte'n thisen an pe a ni.

Sorkar thuchhuah tarlan danin, Covid-19 hripui léng donaa hman atana Chief Minister's Relief Fund-a sum thawh khawm chu nimin tlai dar 3:30 thleng khan cheng nuai 789 a tling tawh. CM Relief Fund hman dan tur ngaihtuahtu Committee on Utilisation of CM Relief Fund chuan May 18, 2020 thleng khan cheng nuai 584 chuang an hmang tawh a ni.

Champhai Nature Conservancy chuan World Bank Road siam hna thawktu Tarmat company nen inremna an neih angin, tun hnai khan Khankàwn leh Mualkawi inkar leh New Champhai leh Zotlang inkara World Bank Road sirah thing ṭiak 1,000 an phun tawh. 

Nora Lalnunpuii (26), Dawrpui West chu May 25, Thawhṭanni chawhnu dar 2:30 vel khan Tuivai luiah a tla hlum a, nimin zing dar 3 vel khan a tlakna lí-ah a ruang hmuh a ni. Thu dawn danin, Nora Lalnunpuii hi a nu ward sister JH Lalzarliani thawhna Sakawrdaiah zinin,  Sakawrdai Community Health Centre (damdawi-in)-a thawkte'n Tuivai kam ramria duty New Vervek task force-te hriselna endik paha thosilên leh an mamawh dangte pea an kalnaah a kal ve a; mi dangin chaw an fâk hlàna luia a cheng chu a tla hlum ta a ni.

SRH-ZMC Covid-19 Bulletin chuan, tunlai hian Zoram Medical College-ah ICT department nen thawk dunin e-learning centre aṭangin online class neih ṭhin a nih thu a tarlang a, "Zirlaite'n an hlâwkpui hle a ni," a ti.

Lunglei leh Serchhipa District Magistrate-te chuan thuchhuah siamin, Mizoram sorkarin district khawpuiah zan dar 7 aṭanga zing dar 7 inkarah curfew a puan avangin magistrate, police, damdawi-ina thawk, district magistrate-in phalna an pekte leh Covid-19 chung­changa duty-te tih loh chu curfew chhungin páwna chhuah khap tlat a nih thu an tarlang. Thupek bawhchhia chu IPC Section 188 hmanga hrem theih a ni.

Khawzawl DC H Lian­zela chuan nimin khan Khawzawla Krishi Vigyan Kendra (KVK) hmun a tlawh a, KVK scientist-te chu lo neitute'n ei leh bâr hlâwk zawka an thar theihna turin ngaihtuahna séng a, an thiamna hmang ṭangkai turin a fuih. Bawrhsap hian Khawzawla quarantine centre-te a tlawh bawk.

Mamit district-a sor­kar quarantine centre hrang hrangah nimin thleng khan mi 144 khung hran mek an ni a, mipa 82 leh hmeichhia 62 an ni. Mamit district-a khung hran mekte chu Tripura, Assam, Tamil Nadu, Meghalaya leh Telangana aṭanga hawte an ni a; Mamit SSA Boys hostel-ah mi 16, Mamit Tourist Lodge-ah mi 34, Po­lytechnic-ah mi 20, Kawrthah Girl Hostel-ah mi pakua, Zawlnuam BDO Rest House-ah mi pasarih, West Phaileng H/S-ah mi 17, Mamit Field Veng Presbyterian kohhran hall-ah mi 20 leh Hmunsam Presbyterian kohhran hall-ah mi 21 an awm a ni.