ZPM-in ZPM MLA-te an thlawp

Zoram Peoples' Movement (ZPM) chuan thuchhuah siamin, Zo Peoples' Movement (ZPM) Legislature Party member-te'n Governor hnena special assembly session ko tura an ngên leh MLA-te hlawh hlui la leh rih tura an rawt chu an thlawp thu leh lawmawm an tih thu an tarlang. 

ZPM chuan, Covid-19 hripui vanga sum harsatna namén lo thleng mek tihziaawmna a nih beiseia MLA-te hlawh hluia kîr leh tura ZLP-te'n ngenna an siam chu ṭha an tih thu sawiin, "CM sawi angin, budget pass hnuah hripuiin budget chu awmze nei loah a chantir a, siam rem a ngai. Cabinet-in siam rem mai loin, budget siamtu house member-te ngeiin kokim taka ṭhukhawmin rél leh se, chu chu tih dan tur dik a ni. Budget siam rem dan rél tura special session koh rawtna tihlawhtling turin sorkar kan ngen a ni," an ti.

ZPM party chuan, state páwn aṭanga lo haw zawng zawngte thinlung takin an lo lawm tih sawiin, "Hnam dang hri vei tamna (red zone) aṭanga lo hawte pawh hri kai loa in lo invên him tlat avangin in fakawm tak zet. Fimkhur a ngaih avangin ramrî-ah inendik a ngai a, inkhung hran a ngai zui a. Hnam pum himna atan a pawimawh tih hriaa thuâwih taka hrehawm in tawrh chhunzawm avangin lawmthu kan sawi a ni," an ti a; lungmuang leh him taka awm tura duhsakna an hlan rualin, fimkhur zel turin an ngen.

Mizoram chhehvelah hripui kai an pung zel a, India ram chu a hluarna ram a ni tawh tih sawiin ZPM chuan, "Hetih laia keini Mizoram min hum tlattu Pathian hnenah lawmthu sawi uar deuh deuh ila. Vanduai vanga kai palh kan awm a nih pawhin, kan doctor-te thiamna hi a rinngam tak zet tih kan finfiah tawh kha; thlamuang tak leh fimkhur taka awm turin mi tin kan inchah a ni," an ti.