Leilet siam belh dan tur sawiho

Nimin khan Kolasib-a IPR department hall-ah Agriculture (Crop Husbandry) director Rohmingthanga Kawlni hoin department hotute leh leilet neitute an inhmu khawm a, Kolasib district-a Covid-19 vanga leilet neitute harsatnate leh leilet tam zawk siam dan tur an sawiho.

Rohmingthanga Kawlni chuan, "Covid-19 vangin harsatna tâwk thei kan ni. Tun dinhmunah Mizoram mamawh buh hmun thuma ṭhena hmun khat chauh kan la thar chhuak a, kan mamawh tam zawk chu state dang aṭangin kan la lut a ni," a ti a; buh thar kawngah Kolasib leh Mamit district chu Mizoram buh zém lian an nih avangin sorkarin nasa taka hmalakna kalpui a tum thu a sawi.

Agriculture Director chuan, Kolasib leh Mamit district-a leilet zawng zawngah buh chìn khah vek a nih theih nan sorkarin kháwl hmangin lei a lehsak vek dawn thu sawiin, "Kolasib district-ah tractor leh lei lehna hmanrua 32 mamawh a nih angin eng emaw zat kan pe ang," a ti.

Agriculture (Research & Education) director Dr H Saithantluanga pawhin thu sawiin, "Covid-19 vang hian agriculture lama kan kal zel dan tur ngaihtuah a ngai a, leilet enkawltu atan hnam dang vai kan chhawr an awm loh lai tak hian kan leilette kan enkawl a ngai," a ti a; sorkarin theihtawp a chhuah bakah, leilet neitute pawhin theihtawp an chhuah ve a ṭul thu a sawi.

Inhmuh khawmnaah hian Koalsib district-a leilet zau 15 aṭangin leilet neitu mi 50 chuang an tel a ni.