Presbyterian hmeichhiate'n HIV/AIDS Vei tan inkhawm thawhlawm pek rel

Presbyterian Kohhran Hmeichhia Mission Vengthlang Kohhran biak-ina rorel inkhawm chuan, HIV/AIDS veite ṭanpui nan Mizoram puma kohhran hmeichhiate Thawhlehni zana inkhawm ṭum khat thawhlawm pek an rel.

Kohhran Hmeichhe rorel inkhawm hi chairman Rinchawii'n a kaihruai a; kum 2016-17 budget atan Rs. 36,00,000 pawmin, chu'ngte chu Central budget Rs. 13,00,000, Women Centre atan Rs. 20,00,000 leh Agape chanchinbu atan Rs. 3,00,000-te a ni.

Kum 2018-a rorel inkhawm neihna atan Tuikual Kohhran biak-in an thlang a, kum 2019-a inkhawmpui lian nghahna atan Kolasib an thlang.

Rorel inkhawmah hian agenda 16 zinga pasarih pawm a ni a; chung zingah chuan, moral reform chungchang zirtirna buatsaih te, Synod Hospital tan charity fund pek te, HIV/AIDS veite ṭanpui nan Mizoram pumah Thawhlehni zan inkhawm vawi khat thawhlawm pek te, Central Committee member tihtlem dan zawn te, ram pum huapa sual thupha chawina leh chhiatrupna thleng thei laka him nan chaw ngheia ṭawngṭai rualte a tel.

Inkhawmpui thupui chu 'Thlarau Thiang-hlim leh a hnathawh' tih niin, Rev. Lalrinmawia'n a sawi. Nimin chawhma inkhawmah Kristian chhungkua leh buhfaiṭhâm tehnaa ti ṭha pathum hnenah lawmman pek a ni a; chungte chu - pakhatna NE Khawdungsei bial, pahnihna Dawrpui bial leh pathumna Lungdai bialte an ni. Inkhawmpui hi nizan khan a ṭiak.

Report-a a lan danin, Mizoram pumah January-December 2015 chhungin ni tin chhung inkhawm nei thei 63.14% an awm a, buhfaiṭhâm ṭham ziah chhungkua 97.90% an awm. Kohhran hmeichhe member zawng zawng 1,69,961 an ni.