Minister pali-in Dawrpui veng an fang

Minister pali - R Lalzirliana, Lalsawta, Lal Thanzara leh C Ngunlianchunga-te chuan Inrinni zing khan Dawrpui venga sorkar hnathawh kal mekte an en a; PWD leh UDPA department hotute'n an ṭawiawm.

Minister-te hi Dawrpui Local Council hruaitute'n an harsatna leh mamawh hrang hrangte an lo hrilh a, harsatna sutkian dan turte an sawiho nghal a ni.

Minister-te hian Bazar Bungkawna pedestrian flyover bridge siam mek tlawhin, mipui tana remchang zawk leh chhawr ṭangkai theih zawk theih dan tur an sawiho a; Aizawl Civil Hospital ram chhunga Dawrpui Multipurpose Centre leh Trauma Centre sak mekte pawh enin, hna thawh kal thuah palh thei ven nan inbiakràwn zel ni se, an ti.

Aizawl Police Station leh Aizawl Civil Hospital aṭanga tui chhe paihna fel tawk lo, mipui tana harsatna thlen theite pawh an enho nghal a; siam ṭhat ngai awmte chu bawhzui ni se, an ti. Vaivakawn leh Bungkawn inkar kawng siam mek an en bakah, Dawrpui Veng huam chhunga inkalpawhna kawng hrang hrang zauh a nih theih nana ruahmannate siamin an enho bawk.