Aizawlah EPF office hawn thuai tum Mizoramah mi 7,000 chuangin EPF zawm

Aizawlah Employment Provident Fund (EPF) office hawng tura Mizoram sorkarin hun eng emaw chen a buaipui hnuah hawn a ni dawn hnai ta. EPF hi Mizoramah mi 7,000 chuang hret chauhin an la zawm a ni.

EPF hi corporation, private school leh damdawi-in, rural bank, sorkar hnuaia board leh sorkar hnathawk ni lo dang te, mi 20 aia tlem lo chhawrte leh, sorkar hnuaia New Pension Scheme hmang ve lote'n hamṭhatna an dawn theihna tura ruahman a ni.

Labour, Employment & Indus-trial Training (LEIT) depart-ment hotute sawi danin, EPF office nei turin EPF-a in-ziak lut mi 50,000 aia tlem lo an awm a ngai a; Mizoramah mi 7,000 chuang hret chauh an la awm avangin, Aizawla office hawn tum hmingah pawh 'Special State Office' tih a ni dawn a, Assistant Provident Fund Commissioner-in a awp ang.

Special State Office hi EPF zawmtu mi 50,000 awm tlin lohna Gangtok, Itana-gar, Imphal, Dimapur leh Aizawl-ahte hawn a ni dawn a; sorkar laipuia Ministry of Labour hnuaia a awm

Aizawla EPF office chu Upper Republic-ah a awm dawn a, remchang hmasaah hawn tum a ni.

LEIT department hotute hnen aṭanga thu dawn danin, EPF & Micellaneous Provision Act, 1952 hnuaiah hna thawktu (employee)-in a hlawh aṭangin 12% a dah ang a, a chhawrtu (employer)-in 12.63% a dah ve thung ang. EPF hi mi 20 chhawr chin chuan an zâwm ngei tur a ni a, mi 20 chhawr tling lo pawhin an duh chuan an zâwm thei tho bawk.

EPF hnuaiah hian hamṭhatna hrang hrang a awm a; kum sarih an zawm tawh chuan inneih nikhuaah ṭanpuina 'marriage assistance' a awm. Hnathawhna aṭanga an châwl a nih chuan pension lak tur a awm a ni.

EPF hmangtute'n hna aṭang-a an chawlh hnua pension lak tur chu an fate pawhin an chhawm thei. Miin EPF a zawm tawh hnua a zawm duh tawh loh chuan a pawisa dah chu a pung zawng zawng nen a la vek thei dawn a; zawm zel a duh chuan, a thawhna hmun sawn mah se, a thawhna thar-ah a zawm zel thei a ni.

EPF hi zawm aṭanga kum 10 a tlin tawh chuan sum chu lak chhuah theih a ni.