AH&Vety Minister-in Piglet Multiplication Farm hawng

RKVY sum cheng nuai 475 sênga Tlangnuam khuaa vawk tihpunna tura din, Piglet Multiplication Farm chu March 11, 2016 tlai khan AH&Vety minister C Ngunlianchunga'n a hawng.

C Ngunlianchunga chuan, Mizote chu sa duh tak ni chungin kan intodelh lo tih a sawi a, "NLUP kalpui a nih hnuah hma kan sawn a, Myanmar leh hmun dang aṭanga sa tam tak kan lakluh ṭhin pawh a ziaawm hle. Duhthusam la thleng lo mahse hma kan sawn a ni," a ti.

AH&Vety Minister chuan, ran chaw pawh state páwn aṭanga lak luh a tam tih sawiin, "Hei hi a reh theihna atan theihtawp kan chhuah zel dawn a ni," a ti a; Tanhrilah ran chaw siamna din mek a nih thu a sawi.

Vawk vulh chu a hralh-na lamah harsatna a awm loh avangin eizawnna atan-a ṭha tak a ni tih sawiin, Ngunlianchunga chuan, Mizo mipuite chu vawk vulh lama nasa zawka ṭan la turin a sáwm.

Piglet Multiplication Farm-ah hian vawkpui 200 vulh a ni dawn a, kah rai ṭhin a ni ang. Ruahman dan chuan farm aṭangin kum khatah vawk 4,000 hralh theih beisei a ni.