BCM-in Pathianni serh kawnga hmalak rel

Baptist Church of Mizoram rorelna inkhawmpui lian ber Assembly vawi 120-na, Hnahthial Bazar BCM biak-ina neih chu nizan khan a ṭiak. BCM chuan, Pathianni serh chungchangah hmalak ni se, a ṭul dana zirin inkaihhruaina siam ni se, an ti.

Assembly-ah hian March 10-12 chhung khan BCM president Rev. Lal-thangliana Hnamte kaihruaiin agenda hrang hrangte ngaihtuah a ni.

An thurel zingah, zûk leh hmuam sim theih nan chak zawka hmalak te, Lunglei South Area Baptist Council (ABC) chu hmun hniha ṭhen te, BCM ordained minister, sorkar hna emaw, rawngbawlna ni lo hna dang vuan an awmin an ordination chungchangah BCM kal dan tur tihchiante a tel.

BCM pumpui huapin kohhran fahrah leh harsa zualte tichangtlunga tinghet turin chhawmdawl uar zawka kalpui te, Mizorama Chanchin Ṭha thlen kum 125-hi lawm tura ruahmanna siamte an rel bawk.

Nimin Pathianni khan chawhma inkhawmah pro.pastor kum thum thawk tawh leh pro.pastor exam hrang hrang paltlang tawh mi pasarih nemngheh an ni a; Inrinni zan inkhawmah kum 2015 chhunga bial sunday school ti ṭha zual pathum hnenah lawmman sem a nih bakah, kum 50 chhung sunday school zirtirtu leh hruaitu ni tawhte chawimawina hun hman a ni.

Report-a a lan danin, BCM hian mission field leh station 25 an nei a, chung zinga 17 chu ram danga mi a ni. Mission field hrang hrangah thawktu 1,230 an awm a, kum 2015 chhung khan ring thar 3,773-in baptisma an chang a ni.