KHAWTHLIR

Thisen pe

Inrinni khan KṬP Sihphir Vengthar Bial leh Khatla Branch-te'n CKṬP blood donation calendar angin thisen an pe. Sihphir Vengthar bial member mipa 36 leh hmeichhia paliin Synod Hospital tan unit 40 an pe a; Khatla branch member mipa 29 leh hmeichhia pahnihin Aizawl Civil Hospital (ACH) tan unit 31 an pe. ACH tan Chhiahtlang Students Union-in 24 leh Thingsuilthliah Students Union-in unit 14 an pe bawk.

DD DG pension

Doordarshan director general C Lalrosanga, Tuikual, Aizawl chu tun hnai khan voluntary pension-in a châwl. C Lalrosanga hi hmarchhak bial mite zinga Doordarshan director general hmasa ber a ni a, kum khat chhung service la nei mah se, February 29, 2016 khan voluntary pension-in a chhuak a ni.

Synod-in rál

KTP General Conference neihna pandal, March 11, 2016 chhuna chimin a delh hlum C Vanmawia, Champhai Kanan Veng chu Inrinni khan vui a ni a, a vuina hun hi Central KṬP hruaitu pasarihin an hmanpui. C Vanmawia hi Mizoram Synod chuan Rs. 20,000-in a rál a; KṬP branch leh bial hrang hrang
aṭanga ràlna sum lut chu Inrinni tlai thleng khan cheng nuai khat a
chuang tawh a ni.

Donation khap

Kawnpui Town Joint V/C chuan, an huam chhungah hmasawnna hna thawktu company hrang hrangte hnenah Kawnpui Joint V/C phalna leh remtihna tel loa donation khawn an rem ti lo.

Lok Adalat thu

Kolasib District Lok Adalat chu Inrinni khan District Court-ah an ṭhu a; thubuai pathum an chinfel bakah, leiba ṭhìnna aṭangin Rs. 5,150 an hmu chhuak.

PAMRA inko khawm

Peace Accord MNF Returnee Association (PAMRA) chuan thuchhuah siamin, vawiin hian an chungchang ngaihtuahin review committee an ṭhutkhawm dawn a, an thuchhuak ngai changin member-te chu Gen. Hqrs. office, Treasury Square-ah kalkhawm turin an hriattir.