Data leh statistics mila hmasawnna Hna thawh dan tur duan tum a ni

Mizoram sorkar hnuaia department hrang hrang hotute chuan, nimin khan Secretariat conference hall-ah data leh statistics rintlak neih dan tur an sawiho. Data leh statistics mila hmasawnna hna thawh dan tur duan tum a ni.

Sawihona hmanpuitu Dr C Vanlalramsanga chuan, department tinte'n sâwt zawka hna an thawh theihna turin data leh statistics mila Mizoram hmasawnna hna thawh dan tur policy duan tum a nih thu a sawi.

Planning Secretary chuan, "Data dik leh rintlak a hun taka neih a nih chuan policy duan leh a bawhzui kawngah nasa takin thawktute a ṭanpui thei dawn a, ram sum leh pai dinhmun, ei leh bar zawnna siamṭhat kawngah leh mipui mimir ni tin mamawh pekna kawngah awmze nei leh sâwt zawkin hna thawh theih beisei a ni," a ti.

Tun dinhmunah Mizorama data leh statistics neih mekte chu mamawh mila lak khawm a nih avangin rintlak tawk loh a awm fo tih sawiin Dr C Vanlalramsanga chuan, "Thil thuhmun rengah department hrang hrang data neih dan a inmil lo fo," a ti a; Mizoramah data leh statistics mila policy siam a harsat thu a sawi.

Planning Secretary sawi danin, Mizoram sorkarin data dik leh rintlak a hun taka lak khawm a nih theihna atan hma a la mek a ni. November 20, 2015 khan university-a mithiam te, tlawmngai pawl aiawh te, political party hrang hrang aiawh leh sorkar official kalkhawmte'n data dik leh rintlak neih dan tur nia an hriatte thawh khawmin, rawtna an siam a, chumi mil chuan approach paper duangin ruahmanna siam a ni.

Meeting-ah hian data lak khawm dan tur leh tihsual palh a awm lohna tura department leh an hnathawh dan mila data rintlak neih dan tur kaihhruaina chungchang an rel.

Department tinte hnathawh dan a inan loh avangin mahni department ṭheuhah data leh statistics lakkhawm leh thehluh hun tur (frequency of submission), an data ṭheuhin a huam chin tur leh hetiang lama thiamna an mamawh dante sawiho a ni a; April 3, 2016 aia tlai loah Planning & Programme Implementation department hriattir ni se, an ti.