Vawiinah session ṭan dawn

Mizoram Legislative Assembly budget session chu vawiin chawhma dar 10:30 hian ṭan a ni dawn a, Governor Lt. Gen. Nirbhay Sharma-a'n thu a sawi ang. Session hian March 31, 2016 thleng a awh dawn a ni.

Assembly Business Advisory Committee (BAC)-in ruahmanna an siam dan chuan, March 16-ah Jammu & Kashmir chief minister thi ta, Mufti Mohamed Sayed sûnna atan hman a ni ang a, chumi hnuah House-a Larsap thusawi chungchanga lawmthu sawina motion sawiho a ni ang.

Kum 2016-17 atana Mizoram budget atana ruahman chu Finance Minister-in March 17-ah a pharh dawn a, sorkar kum chhunga sum indaih lohna phuhrûkna tur, Supplementary Demand for Grants a pharh tel nghal ang. March 21-ah budget chu a tlangpui sawihoa pass tum a ni.

Assembly session atan hian nimin tlai khan zawhna House-a chhan tur (starred question) 328, ziaka chhan tur (unstarred question) 31 a lut tawh a; private resolution 56 lutin, paper pharh tur pathum a awm. Nimin tlai dar 4 vel thleng khan bill lut a la awm lo.