Two party system a theih loh: Duhoma

ZNP chuan nimin khan an party pisaah an vice president thar pahnih - C Laitanga leh Prof. Thangchungnunga te lawmna inkhawm an hmang. ZNP president Lalduhoma'n thu sawiin, two party system chu thil âwm lo leh theih loh tih chiang sa a nih thu a sawi.

Lalduhoma chuan, ZNP vice president K Liantlinga'n MNF a zawm chungchang sawiin, MNF chu di phur nen a tehkhin a, "Mahni thâwm chauh hria an ni. Mi beidawng tlêmtê an lawmluh vanga sorkar tur thâwka an thaw hi a hisáp neih tàwi thlak hle. MNF hi red card hmu tawh an ni a, MNF sorkartir loh hi thil har a ni lo a, a záwna term thum opposition-a awm hmabak an ni," a ti.

ZNP President chuan, MNF hruaitute chu zêldin thubâwl thiam tak leh mumang rama chêng
ṭhinah puhin, "Duhthusam ram mak pui pui an tuipui thei zel. Tunah pawh two party system an au chhuahpui leh ta a, thil âwm lo lutuk leh theih loh tih chiang sa aupui aupui hi an ze thlah theih loh a ni," a ti a; ZNP aṭanga MNF-a an lawm luh anga an sawi zingah finfiah dâwl lo a tam niin a sawi.

ZNP inkhawmah hian vice president thar pahnih - Prof. Thangchungnunga leh C Laitanga ten thu an sawi bawk.