City Park chei that dan tur enfiah

UDPA minister Zodintluanga chuan, nimin zing khan Atal Mission for Rejuvenation and Urban Transformation (AMRUT) hnuaia Aizawl City Park chei ṭhat tura rua-hmanna awm mek a hmunah a enfiah.

Zodintluanga chuan, Aizawl City Park chei thar chungchanga DPR siam tawh enin, a siamtute hnenah hmathlir thui tak nei chung-a ṭhangtharte tan rochun tlaka duan a duh thu a hrilh a, "Ṭum khatah AMRUT sumin daih nghal vek lo mah se, zawi muanga tihpuitlin a nih theih ka beisei," a ti.

City Park chu naupang hruai ngam lohna khawpa ruihhlo tih nan leh nawmchen nana hmang an awm thu hriat a ni ṭhin tih sawiin, thianghlim zawk leh chhungkua pawha lên ngamna hmuna siam an tum tih a sawi.

Hnam changkang zelah nupaa hnathawk an pung zel tih sawiin UDPA Minister chuan, "Mahni fate kalsan a ṭul chánga naupangte intihhlimna tur hmun telh a ni hi a lawmawm hle," a ti a; ṭhalaite'n an thiam thil pholan nan leh thil dang dang tihna hmun atan amphitheatre dah tel hram ni se a duh thu a sawi.

Aizawl City Park cheina tur rawtna tharte peih fel a nih veleh UDPA department hotute chuan hna thawh ṭan nghal an tum thu an sawi.

Zodintluanga sawi danin, City Park tihchangtlunna tura ruahmannaah solar panel hmanga power supply siam te, CCTV dah te, man chawia hman theih tur amphitheatre siam te, City Park aṭanga Aijal Club awlsam zawka kalpawhna siam te, tuna restaurant awmnaah multi level car parking siam te, naupang awmtleina hmanrua eng emaw zat dah belhte a tel a ni.

Nimin zing vek khan UDPA Minister chuan State Convention Centre sakna tur Circuit House hmun a tlawh nghal a, hnathawk kal mekte a en. Minister chuan, fûr ruahtui tlak hmain lei laih theih ang angte laih zawh a nih theih nan contractor-in ṭan la se, department engineer-te pawhin ṭhahnemngai takin en zui se a duh thu a sawi.

Minister Zodintluanga hi UDPA secretary Dr C Vanlalramsanga, joint secretary Vanlalmawia, director Zorammuana leh officer dangte'n an ṭawiawm a ni.