City bus neitute'n Thingdawl thil thleng pawi an ti Kha bus kha kan hriatpui loha tirh a ni - ACBOA

Aizawl City Bus Owner Association (ACBOA) chuan thuchhuah siamin, state dang aṭanga Mizoram rawn haw phurtu city bus vanga Thingdawl khuain harsatna an tâwk chu pawi an tih thu an tarlang a; Thingdawla harsatna thlentu city bus chu ACBOA hriatpui loha tirh a nih thu an sawi.

ACBOA chuan, state páwn aṭanga rél hmanga lo hawte Bairabi rél chawlh hmun aṭanga an awmna tur district ṭheuha dah tur chungchangah Aizawl DC nen inremna mumal tak siam a nih angin, DC pisa lamin an mamawh mil zelin city bus tirh ṭhin a nih thu an tarlang a ni.

ACBOA chuan, "Pathiannia tangkhang phurtu Thingdawl khuain harsatna an tawh phahna city bus chu ACBOA-in a tirh a ni lo a, hetianga an hriatpui loa city bus kaltir a ni hi kan hrethiam lo hle," an ti a; tun hnuah chuan ACBOA hriatpuina tel loin city bus tirh chhuah tawh loh ni se an duh thu an sawi.