Lungleiah legal awareness seminar

Lunglei District Legal Service Authority buatsaihin nimin khan DC conference hall-ah 'Laws relating to socio-economic life' tih thupui hmangin legal awareness seminar neih a ni a, Lunglei DC Abhijit Vijay Chaudhari-a'n a hmanpui.

Lunglei DC chuan, State Legal Services Authority chu Mizoramah kum 1987-a din a nih thu sawiin, "District Legal Services Authority hi a hnuaia pêng pakhat a ni. Dikna hi mipui chanvo a nih avangin dan leh hrai kan hriat a ngai a, ram chhunga mi zawng zawngte chu dan hnuaia awm kan nih vek angin mipuite ko khawma dan hrang hrang inzirtir hi a pawimawh hle," a ti.

Seminar kaihruaitu Lunglei chief judicial magistrate Dr HTC Lalrinchhana'n chuan, "Sorkar department hrang hrangte pawhin dan leh hrai chungchang kan hriat a ngai. Ei leh bara kan intodelh theih dan hi inhrilhhriat a ṭul hle bawk," a ti.

Seminar-ah hian mithiamte'n thupui hrang hrang hmangin thu an sawi a, sawiho nghal a ni.