Hnam Chhantu Handicrafts Exhibition a hawng

Hnam Chhantu Pawl chuan, nimin aṭang khan Vanapa Hall-a Handicrafts Exhibition an buatsaih a, Industries minister H Rohluna'n a hawng.

H Rohluna chuan, Mizote’n thing leh mau aṭanga thil siam (handicraft) lamah hma kan sawn thu sawiin, "Kan theihna erawh kan la pho chhuak tam lo. Inpho chhuahna tur hun leh hmun Hnam Chhantu Pawlin an buatsaih ṭhin hi a lawmawm hle a ni," a ti.

Thing, mau, changél leh thil dang hmanga thil siam kawngah hma sawnna tur tam tak a la awm tih sawiin Industries Minister chuan, "Chumi atan chuan Industries department pawhin project siama hma lak zel a tum a ni," a ti a; hmasawn zel tur chuan kut themthiamte leh department thawhho thiam a ṭul thu a sawi.

Handicrafts Exhibition hi National Agro-Forestry & Bamboo Mission hnuaia Bamboo Development Agency-in a sponsor a ni a; dawr 22-ah thil siam chhuah chi hrang hrang 60 chuang pho chhuah niin, March 19 thleng tlawh theih a ni ang.