N. America-ah Zootopia a la dingchang

Movie lamah a thar chhuak awm mah se, Zootopia tluka sum lalut hnem an la awm rih chuang lo. Hapta hnihnaah pawh Zootopia chuan pakhatna a la luah thei cheu a, kar tawp chhung khan USD mtd 50 zet a lalkluh belh leh.

Zootopia hian kar liam ta chhung khan USD mtd 50 a lalut a, a hmaa a lo lak luh tawh, USD mtd 75 te nen US bikah chauh USD mtd 125 zet a thawk chhuak tawh a ni. Movie thar 10 Cloverfield te, The Young Messiah te a awm nachungin, hengte hian an la tluk lo a ni.

10 Cloverfield Lane hi science fiction film a ni a, Michelle chu car-in a chesual a, a harh chhuah chuan leihnuai khurah mipa pahnihte nen an lo awm ho a, chung mite chuan pawn lam khawvel boruak chu chemical thil avanga mihring tana dam harsa khawp a ni tih an hrilh a, a tawpa Michelle-i'n pawn lam khawvel nihphung tak tak hrechhuak tura a beihna leh thudik a hriatna chanchin a ni. Box office-ah hian pahnihnaah a lang pha.

The Young Messiah hi Kristian film a ni a, Isua chanchin a ni. He movie hi Anne Rice lehkhabu ziah, 'Christ the Lord: Out of Egypt' behchhana siam a ni. A nausen laia Aigupta-a Isua an tlan bopui hnua Nazareth khuaa an kirpui leh chanchin a ni ber. Isua chu kum sarih mi a ni tawh a, a nuna thil tak tak, a nun tak tak a hriat chhuah chanchin a ni. Aigupta-a Alexandria khua aṭanga Nazareth an panna kawnga thilmak hrang hrang thleng chanchin a ni a, Bible-a lang bak Isua chanchin a ni ber a, pasarihnaah awmin, kar tawp chhung khan USD mtd 3.4 a hailut. Kristian film dang, Isua thawhlehna chanchin, Risen chu top 10-ah a la lang.

Box office movie

"Zootopia" - $mtd50

"10 Cloverfield Lane" - $mtd25.2

"Deadpool" - $mtd10.8

"London Has Fallen" - $mtd10.7

"Whiskey Tango Foxtrot" - $mtd4.6

"The Perfect Match" - $mtd4.2

"The Young Messiah" - $mtd3.4

"The Brothers Grimsby" - $mtd3.2

"Gods of Egypt" - $mtd2.5

"Risen" - $mtd2.3