ZPM ngaih pawimawh hmasak chu ram rorelnaa Pathian ram tun din a ni - ZPM President

ZPM president Lalliansawta chuan, an party-in an ngaih pawimawh hmasak chu ram rorelnaa Pathian ram tun din a nih thu a sawi a, BJP nen an thawh dun dawn loh thu a sawi nawn bawk.

Lallansawta hian vawiin November 4 chhunah khan Aizawl Press Club-ah thuthar thehdarhtute a kawm a; ZPM-in thil tum hlawm lian pasarih an neih thu sawiin, "A hmasa berah ram rorelnaa Pathian ram tun din tih dah a ni a, kan ram kalphung pawimawh tinrengte hi Pathian duh dana dik leh thianghlim taka kalpui kan tum tih lantirna a ni. Ram rorelnaah hian Pathian ram kan tung ding dawn tih lantirna a ni," a ti.

Kalphung thar, mipui sorkar din ngei an tum tih sawiin Lalliansawta chuan, "Mipui hian mamawh kan nei a, chu'ngte chu Pu Ṭhenphunga Six Basic Needs te kha a ni. Mipui hian anmahni ngaihsaktu sorkar an thlahlel a, an nghak a, an beisei mek a, chu chu kan hma lawkah hian a awm a, kan hmu ṭep a ni," a ti a, party sorkar ni lo, mipui sorkar din an tum thu a sawi.

ZPM President chuan, ZPM thli na takin a tleh mek tih sawiin, "Sum leh pai thil tih theihna aiin ZPM thli hi a chak zawk ngei ang tih kan beisei. Last minute an sawi ṭhin a, last minute-ah sum sem vak an awm ṭhin a, a pawi hle. Pathian ringtu nih nen a inmil lo a ni," a ti a; last minute-a sum sem lakah inveng turin mipui a chah.

Lalliansawta chuan, BJP nen thawk dun tura puh an nih ṭhin chungchangah, "Rin thu leh belhchian dawl lo hmangin BJP nen thawk dun tur angin min sawi chiam a, a pawi hle. Thawh dun tumna a awm loh thu chiang takin kan sawi tawh a ni," a ti a; BJP thawhpui mektu chu MNF an nih thu a sawi.

ZPM President hian MLA inthlanpuiah vote thlak vek turin mipui a sawm a; ram rorelnaah Pathian ram tun din a nih a, mipui sorkar a pian theih nan ZPM candidate-te vote vek turin mipui a ngen a ni.