Seat 25/26 lak kan inbeisei - Lalsawta
Mizoram Pradesh Congress Committee (MPCC) president Lalsawta chuan, November 7, 2023-a Mizoram inthlanpuiah chak turin an inring tâwk hle a, seat 25/26 lak an inbeisei thu a sawi.
Lalsawta hian vawiin November 4, Inrinni chhun khan Aizawl Press Club-ah thuthar thehdarhtute a kàwm a; zawhna chhangin, an elpui party-te inrin dan aia nasain an inrintâwk thu a sawi a, "Anni ai chuan kan inringtâwk zawk. Kan sorkar a ngai a, seat 25/26 la turin kan inthai reng a, kan thai pung zel zawk a ni," a ti.
BJP chu Kristiante tan an hlauhawm nia sawiin Lalsawta chuan, "BJP hian hmarchhakah Mizoram tiamin regional party thawhpui an nei vek. BJP-in MNF an thawhpui mek a, thil kal dan thlirin ZPM thawhpui an tum leh mek a ni. BJP thawhpui ngai lo tur Congress party hi Mizoram mipuiin min thlang turin kan ngen a ni," a ti a; MNF party chu BJP an thawhpuina titawp turin a chah.
Zawhna chhangin Lalsawta chuan, sorkar siam turin BJP leh MNF chu an thawhpui theih ngai loh tur thu a sawi a, thil awm dan azirin ZPM erawh an thawhpui theih mai theih thu a sawi.
MPCC PRESIDENT INTIAMNA
- Thlei bik nei lo, sorkar dik, eiruk awm lohna, hnathawk chak leh mipui tana chhawrnahawm kan siam ang.
- Hriselna kawngah healthcare ṭha zawk leh health insurance cheng nuai 15 thleng kan siam ang.
- Sorkar hnathawkte tan leh sorkar ngei tan pawh a ṭhat zawk avangin old pension scheme hman leh kan tum.
- All Mizoram CSS Employees Coordination Committee harsatna chinfelsak vek kan tum ang.
- Loneitu, kut hnathawk, ṭhalai leh kawng hrang hranga hna thawk mekte tan eizawnna ngelnghet an neih theih nan Ṭang Puihna kan buatsaih dawn.
- Chhungkaw harsa tam tak tan subsidise gas bur khat Rs 750-a lei theihin kan siam ang a, thla tin electric bill unit 100 chauh hmang chinte free-in kan pe bawk dawn.
- Hmeithai leh chhungkaw châwmtu hmeichhe tam tak tan an pualin ṭanpuina kan buatsaih ang.
- Tar chàwmna hi state sorkar sum hman belhin thla tin Rs 2,000 dawng turin kan tipung ang.