Inthlan campaign hun a tâwp

November 7, 2023-a Mizoram Legislative Assembly inthlanpui neih tura campaign hun chu nimin Pathianni tlai dar 4 khan a tàwp a, campaign phal a ni tawh lo. Inthlana duty tur polling party eng emaw zatin nimin khan an duty-na hmun tur an pan.

Kalphung pangngai angin, inthlan campaign theih hun hi inthlan vote thlâk tàwp hun darkar aṭanga chhiar lêta darkar 48-naah a tàwp ṭhin a, chu chu nimin tlai dar 4 kha a ni. Nimin tlai dar 4 aṭanga vote thlâk hun tàwp, November 7 tlai dar 4 thleng chu silent period tih a ni a; inthlan campaign kaihhnawih thil reng reng tih phal a ni lo.

November 4, Inrinni kha political party-te'n inthlan a zawh hmaa press conference an neih theih hun hnuhnung a ni a, Aizawlah chuan political party paliin press conference ṭum ruk an nei a, politics kaihhnawiha pawlin press conference an neih ṭum khat a awm bawk a; hriat theih chinah ni khata Aizawla press conference a tam ber ṭum a ni.

Silent period a nih tawh avangin MLA candidate-te leh anmahni puitu party worker-te chu an awmna constituency ni lo, constituency dangah awm tawh lo tura hriattir an ni a; silent period chhungin inthlan kaihhnawiha mipui ngaihdan lakna (opinion poll) thil reng reng media-ah tihchhuah khap a ni bawk.

Silent period chhung hian flying squad, static surveillance team leh team dangte'n dan bawhchhiatna a awm leh awm loh an vil a; Media Certification & Monitoring Committee-te'n media leh social media-te ngun takin an vil bawk a ni.

Inthlana duty tur polling party zinga kalkawng ṭha lo deuh leh hmun hla zuala duty turte chuan nimin khan district headquarters aṭangin an duty-na hmun tur an pan.

Hmun hla deuh leh kalpawh harsat zualna deuh polling station-te chu P-2 (P minus 2) tih a ni a, P-2 polling station 149 a awm. Nimin zing dar 6 aṭang khan an chhuak ṭan a, chawhnu herah an chhuak kim. Polling station hnai deuh, kal thlen harsa lo 1,127-a duty turte chu vawiin hian an chhuak ang.