Vote chhiar ní sawn tura ngennaah ECI aṭangin chhànna la dawng lo

Mizoram Kohhran Hruaitute Committee (MKHC) bultuma tlawmngai pawl leh political party hrang hrangte'n Mizoram inthlanpui vote chhiar ni sawn tura November 3, 2023-a an ngen nawnnaah, darkar 24 chhunga chhanna hmuh beisei mah se, Election Commission of India (ECI) aṭangin chhànna an dawng lo. Hemi chungchangah hian hmalak zui zel an tum.

Mizoram inthlanpui vote chhiar ní, December 3, 2023 chu Pathianni a nih avangin, Pathianni leh Inrinni ni lo-ah sawn turin MKHC leh MPF bakah, NGO Coordination Committee leh political party hrang hrangte chuan ngenna ECI-ah ziakin an lo thlen tawh a; ECI aṭangin chhanna a awm loh avangin MKHC bultumin pawl hrang hrangte chuan November 2, 2023 zan khan hmalak zui zel dan tur Synod Office-ah an ngaihtuah a ni.

Pawl hrang hrangte inhmukhawmin ECI-ah ngenna thlen nawn leh an rêl angin, November 3 khan Mizoram CEO hnenah ngenna lehkha an thehlut leh a; an lehkhaah chuan darkar 24 chhung ngeiin chhànna hmuh an beisei tih an tarlang.

Vanglaini palai zawhna chhángin MKHC Chairman chuan, an beisei hun tiam ral tawh mahse nimin (Pathianni) thleng khan ECI aṭangin chhànna an la dawng lo tih a sawi a, "Bawhzui zel dan tur kan sawi lâwk lo a, kan la bawhzui rih lo. Kan duh ber hi vote chhiar ní sawn a ni a, hun a la awm deuh bawk a, a la tlai lo a, hmalak zel dan tur kan la ngaihtuah ang a, theihtawp chhuahin kan bei zel ang, ngawih mai kan tum lo," a ti.