Aizawl dist-ah zualkona lian a awm lo; DEO-in vote thlâk turin mipui a sáwm

Aizawl district election officer Nazuk Kumar, bawrhsap chuan, Aizawl district-ah Mizoram inthlanpui kaihhnawihah zualkona (complaint) lian tham an dawng lo tih a sawi a; naktuka inthlan turah vote thlâk ṭheuh turin mipui a sáwm.

Nazuk Kumar hian November 4, Inrinni khan thuthar thehdarhtute a kâwm a; zawhna chhángin, "Complaint tênau paruk/pasarih vel kan dawng. Complaint zingah thu lian tham a awm lo a, political party leh candidate emaw, Model Code of Conduct bawhchhiatna lam hawi emaw kan dawng lo," a ti a; complaint thehlut duh tan Cvigil application-ah thehluh theih a nih thu a sawi.

Aizawl DEO chuan, MLA inthlanpui chu kum nga dana neih a nih thu sawiin, voter zawng zawng vote thlak ngei turin a sáwm a; vote thlâkna hmuna kal tura harsatna nei an awm chuan sawi hreh lo tur leh, a bikin upa lam leh taksaa harsatna nei puih mamawhte harsatna sutkiansak turin an inpeih reng thu a sawi.

Nazuk Kumar chuan, November 5, Pathianni tlai dar 4 aṭangin campaign phal a ni tawh lo tih sawiin, "TV leh hmanraw dang hmanga inthlan kaihhnawih thil tarlan leh tihchhuah khap tlat a ni a, TV, cinema leh media dangah an pho chhuak tur a ni lo. Thupek zâwm lote chu kum hnih thleng tàntir emaw, lei chawitir emaw, a pahnih emawa hrem theih a ni," a ti.

AIZAWL DISTRICT DINHMUN AIZAWL DEO TARLAN

▶ Inthlannaa hman tur EVM/VVPAT-te candidate aiawhte hmaah November 3, 2023-ah chinfel a ni.

▶ November 4-ah polling duty turte training vawi thumna leh hnuhnung ber neih a ni.

▶ Polling party-te duty-na tur November 5-ah thlan/pawh a ni ang.

▶ Aizawl district-a constituency tinah pink polling station pathum zel siam niin, 66 a awm; pink polling station hi hmeichhia hlirin an enkawl dawn.
▶ Polling party-te chhuahna (dispatch centre) atan AMC Sports Complex (Bawngkawn), Chaltlang khelmual, College Venga khelmual leh Tlangnuam Field-te ruahman a ni a, November 6-ah an chhuak ang.

▶ EVM strong room (dahṭhatna) hmun Govt. Aizawl College, Assembly Annexe leh Aizawl DC Office-ah siam a ni a; heng hmunahte hian vote chhiar a ni ang.

▶ Kum 80 chung lam leh rualbanlote vote thlaktir zawh a ni tawh.

▶ November 2 thlengin postal ballot hmangin vote 3,075 a tla tawh.

▶ Venhimna kaihhnawih thil ruahman fel a ni tawh a, police duty turte tirh chhuah tawh a ni.

▶ Voter information slip ruahman tawh a ni a, voter tin hnena pek turin BLO-te kutah dah a ni.

▶ Polling station 192-ah webcasting tih a ni.