Inthlan inbuatsaih danah lungawi

Lunglei district-a general observer, police observer leh expenditure observer-te chuan November 4, Inrinni khan MLA inthlanpui neih tura venhimna leh vote thlak dan tur inpuahchahna sorkar hotute nen an thlirho a; sorkar hmalak dante lungawithlak an tih thu an sawi.

Ṭhutkhawma tarlan danin, kumin inthlanpui atan Lunglei district-ah Mizoram Police leh state armed police force (SAPF)-te nena thawkho turin central armed police force (CAPF) company paruk an awm a, constituency pakhat zelah flying squad team pahnih leh static surveillance team pahnih an duty ang. Lunglei district chhungah check post (NAKAS) pali, Kawrpuichhuah, Tlabung, Lungsen leh Bunghmunah pakhat ṭheuh din a ni.

Quick Response Team pakua din a ni tawh a, constituency paruk vil turin sector police officer 24 ruat niin, inbiakpawhna lam buaipuitu tur ruat vek tawh a ni.