Inthlan nía phal loh thil tichhuak

Aizawl bawrhsap leh district election officer Nazuk Kumar chuan naktuka Mizoram inthlanpui awm tur kaihhnawihah hriattir a chhuah a; inthlan ní-ah polling station aṭanga metre 100 huam chhungah vote dilna anga ngaih thei thil reng reng tih phal a nih loh thute a tarlang.

Aizawl Bawrhsap chuan, November 5, tlai dar 4 aṭangin campaign phal a ni lo a, silent period a inṭan tawh avangin political party leh candidate-te chu campaign tawh lo turin a hriattir a, "Constituency páwn aṭanga campaign tura lo kal, chu constituency-a vote nei si lote chuan constituency an chhuahsan tawh tur a ni. Hei hian candidate leh election agent-te leh party office bearer, state in-charge ruatte chu a huam lo," a ti.

DEO chuan, electronic/social media leh a tlukpui dangteah inthlan kaihhnawih, mipui rilru sûkthlêk tidanglam thei thilte tarlan/chhuah phal a nih loh hu te, mipui ngaihdan lâkna opinion poll siam leh exit poll tih phal a nih loh thute a tarlang bawk.