Lawngtlaiah Covid-19 dona sawiho

Lawngtlai DC Shahshanka Ala leh Central Young Lai Association (CYLA) hruaitute chuan nimin khan CYLA pisaah Covid-19 donaa hmalak dante an thlirho. He hunah hian CYLA hruaitute chuan quarantine facility-a hman tur mipui thawh khawm mutbu leh bungraw dangte DC kutah an hlan.

Quarantine facility-a hman tur Lawngtlai mipuiin an thawh khawmte chu Pathianni aṭanga CYLA hnuaia branch-te'n an khawn khawm a ni a; nimin thleng khan blanket 278, bedsheet 331, mattress 126, lukham 110, lukham káwr 42, thingpui no 35, tui no 20, bucket 13, thlêng pahnih leh insûkna brush pakhat leh pawisa fai Rs. 7,500 a lut tawh.

Meeting-ah hian Covid-19 laka Lawngtlai district a him zel theihna tura hmachhawp leh rawtnate sawiho a ni a, state páwn aṭanga hawte dawnsawn dan leh khung hran danah, felfai zawk leh him zawka hmalak dan tur te, chanchin inhre pawh zung zung thei tura ruahmanna te, hriat lâwk loha state páwn aṭanga mahni lirtheia lo hawte'n harsatna an thlen loh nana Thingkaha check point dah a ṭul dante sawiho a ni. CYLA hruaitute chuan, Covid-19 donaah theihtawpin sorkar an thawhpui zel dawn thu an sawi.