KHAWTHLIR

Heroin man

Assam Rifles sipaite leh Excise & Narcotics department mite chuan November 3, 2023 khan Champhai Tlangsam huam chhungah heroin (no.4) gram 295.28 an man a, international market-ah Rs 2,06,69,600 hû a ni. Heroin kawltu Ensawmmanga (33), Bulfek, Myanmar an man nghal bawk.

Lirthei tlân dan

Inthlan ní, November 7, Thawhlehni tlaiah polling party an haw khawm dawn avangin zan dar 6-12 inkarah Zodin Square leh Raj Bhavan inkarah chhim lam aṭanga hmàr lam panin lirthei tlan phal a ni dawn lo a, Raj Bhavan hmar lam gate bul aṭangin Tennis Court/Temple Square lamah tlan theih a ni ang.

Khapna thupek

Aizawl district bawrhsap Nazuk Kumar chuan MLA inthlanpui neih tur kaihhnawihah November 4, Inrinni khan thupek a tichhuak a; Aizawl district-ah mi panga aia tam punkhawm leh inhàwrkhawm phal a ni loh thu leh aurinna (loudspeaker) hman khap a nih thu a tarlang. Thupek zâwm lote chu IPC Section 188 hmanga hrem theih an ni.

DEO-in media kâwm

Champhai DEO James Lalrinchhana chuan November 4, Inrinni khan DC conference hall-ah thuthar thehdarhtute a kâwm a, Champhai district MJA vice president Lalhlupuia hnenah media mite tana polling station luh phalna, Authority Letter for Mediapersons a hlan.

Tuiah tla hlum

Nimin chawhnu dar 2:30 vel khan Lalpekhlua (16), New Siaha chu Kawlchaw luiah a tla hlum. Thu dawn danin, Lalpekhlua hi Adventist English Academy School, Siaha-ah lutin, hostel-ah a awm a, nimin khan hostel-a awm pawl 10 zirlaite chu an zirtirtute nen Kawlchaw luiah an kal a, Lalpekhlua hi livirah chesualin, a ṭhiante'n chhan tum mah se, an chhan thei lo. A tlak aṭanga darkar chanve velah a ruang lak chhuah a ni.